21.7.16

Hökumətin dərdi İrandımı?

Nardaranda hökumət qardaş qanı tökəndə bəzi yoldaşlar çıxdı, bu qanlı və qəddar hadisəyə haqq qazandırdı. Dedilər ki, İran Tale Bağırzadə vasitəsi ilə Azərbaycanda çeviriliş edib, şəriət dövləti qurmaq istəyirmiş, bunun qarşısı alınıb.
***
Buyurun, artıq o iş üzrə məhkəmə prosesi başlayıb. Məlum olur ki, İran-filan nədi, "Milli Şura, Cəmil Həsənli, Əli Kərimli çeviriliş etmək istəyirmiş". Yəni, istintaqın məqsədi belə olub. Tale Bağırzadəyə və onunla birgə tutulanlara ağır işgəncələr verərək Milli Şura və onun rəhbərliyi əleyhinə ifadə almaq istəyiblər.
***
Noldu bəs? Hanı İran izi? Aydın olurmu ki, hökumətin İranla Turanla problemi yoxdur. Onlarla səmimi bazara münasibətlərindədirlər. Alırlar, satırlar. Elə bu Nardaran qətlyamından sonra İranla Azərbaycan arasında çoxsaylı iqtisadi əməkdaşlıq sənədləri imzalanıb. Bu necə olur, dostlar?
***
Çox sadə. Hakimiyyətin məqsədi min yerdən bəhanə uydurub ölkədəki əsas və prinspial müxalifəti sıradan çıxarmaqdır.
Hökumət dünyaya süni paradiqma təklif etmək istəyir. O sivil-dünyəvi, demokrat müxalifəti yox edib, göstərmək istəyir ki, ay dünya, ay camaat baxın. Sizin qarşınızda iki seçim var: bir radilkal dindarlar, o birisi də biz. Baxın, seçim sizdədir. ( o başqa mövzudur ki, zülm zillət, indiki kimi davam eləsə, istənilən seçimdə xaq hətta ən radikal dini təmayülü seçəcək nəinki qalstuklu cəllad və adamyeyənləri)
Milli Şuraya qarşı onların daha etmədiyi qalmadı. Bu baş verən əslində Azərbaycanın qabaqcıl müxalifətinə qarşı dövlət terrorudur.
Çox təəssüf ki, hökumətin dünyaya özünü "sekülyar, modernist" kimi özünü təqdim etməsinə, bəzi səmimi sadəlövhlərimiz də dəstək olur. Nardaran hadisəsində olduğu kimi. Mən sizi dəvət edirəm. Dönün geriyə Nardaran hadisələri zamanı yazdıqlarınızı bir də təftiş edin. Eləcə də bu gün davam edən məhkəmə prosesini ciddiliklə izləyin.
Günhasız məhbuslarımıza dünya görüşlərindən asılı olmayaraq azadlıq tələb edirəm!