29.12.14

`Evə dönüş`, yaxud əclaflığa sevinənlər

Azad və tənqidi düşncəli media quruluşları bağlananda, təzyiqə tuş gələndə sevinənlər var.
Azad və tənqidi düşüncələrinə görə insanlar şərlənəndə, həbs olanda, onlara ləkə atılanda buna da sevinənlər, sevincini gizlətməyənlər olur.
Mən belələrini başa düşürəm. Hətta çox məmnunam ki, onlar `timsahın göz yaşları`n axıdıb riyakarlıq eləmirlər. Ancaq bu tip adamlardan bircə xahişim var, bircə saat yarım vaxtınızı ayrın Türkiyə istehsalı olan `Evə dönüş` filmini izləyin. Youtube`də də var.
Baxın, sonra danışarıq.

Allahşükür müəllimin qədrin bilək

Mən fürsət tapıb Allahşükür Paşazadənin məsciddə əliyevlərə mədhiyyəsini yenicə izlədim. 
Gəlin, Allahşükür müəllimə təşəkkür edək. Onun varlığı geniş düşünsək, hazırkı vəziyyətdə xalqımıza xeyirdir. Bir cümləni də düzgün qura biməyən adam, mənfi imici ilə əliyevlər barədə bir yox e, min bir tərif, mədhiyyə desə də bu realda işləmir. Mübaliğə etmirəm, siz videonu diqqətlə izləyin, bu adamın bir cümləsi də məna cəhənnəm, formal, qramatik baxımından da düz deyil.


İndi isə bir anlıq düşünək ki, iraq olsun, Allahşükürün yerində daha xarizmatik, daha savadlı, ötkəm biridir və o əliyevləri xalqa sırıyır. Bu bizə iki qat zülm olardı.
Görünür Uca yaradan bizə qarşı hələ rəhimlidir.

Allah, sənə şükür, şükür!

Allahşükür Paşazadə barədə daha bir ilginc yazını burdan OXU

28.12.14

Allahşükür Paşazadə sağ olsun!

Mən fürsət tapıb Allahşükür Paşazadənin məsciddə əliyevlərə mədhiyyəsini indi izlədim. (VİDEOya baxmaq üçün bura tıkkıldat)
Gəlin, Allahşükür müəllimə təşəkkür edək. Onun varlığı geniş düşünsək hazırkı vəziyyətdə xalqımıza xeyirdir. Bir cümləni də düzgün qura biməyən adam, mənfi imici ilə əliyevlər barədə bir yox e, min bir tərif, mədhiyyə desə də bu realda işləmir.
Bir anlıq düşünək ki, iraq olsun, Allahşükürün yerində daha xarizmatik, daha savadlı, ötkəm biridir və o əliyevləri xalqa sırıyır. Bu bizə iki qat zülm olardı.
Görünür Uca yaradan bizdən mərhəmətin tam kəsməyib.

10.12.14

Aclıq aksiyasının iki fotosu

Tarix üçün.
2012-ci ilin mayı. Məhbəsdəki siyasi məhbuslar üçün aclıq aksiyası keçirilir. Təşkilatçı İctimai Palatadır.
Avrovizya mahnı müsabiqəsi ərəfəsidir.


Asif Yusifli üçün təbrik

Mən bu günü Asif Yusifli günü elan edirəm.
Dünən, onun ad günü imiş. Onun təvəzökarlığından, mənim də səhlənkarlığımdan ad günü unudulub. Amma belə baxanda nə fərqi? Əsas odur ki Asif kimi bir insan var, doğulub və o mənim girami dostumdur.
Asif elə bir dostdur ki, qəbir evində İnkir Minkir "o dünyada qazandırğın nə olub, ay insan", soruşsa, "Asif Yusifli" deməklə canımı qurtaracağımı düşünürəm.
Asif mənim üçün hamının başa düşəcəyi formada heç bir iş görməyib, hətta dəfələrlə nəyə görəsə mənə köynək almaq vədini verib, sonra onu namərdcəsinə unudub. Bunlar heç.
Bəs, Məşədi İbad demişkən, mən onun nəyinə heyranam?
Cavab sadədir: Mən bu yola çıxanda Asif bəy tanıdığım minlərdən biri idi. Həyatın ağırlığı, mübarizənin dramatikliyi, kasıblıq, illət, zillət onu sındırmadı. Əksinə, illər keçdikcə onun polad kimi bərkidiyini gördüm. Və bu proses müsbət istiqamətdə artmaqdadır.
Asif, dizlərim taqətdən düşəndə baxıb farağat dayandığım insanlardandır.
Asif bəy, səni bağrıma basıram. Bu gün mənə de ki öl, ölməsəm namərdəm! Mübarəksən!

(bu qeydlər, ötən il-2013-də Asif bəyin ad günü münasibəti ilə yazılıb)

2.12.14

Seymur Həzi haqda



Nazim Hikmətin məşhur bir şeiri var, "bu gün bazar" adında. Şairi uzun müddət qapalı şəraitdə həbsdə saxlandıqdan sonra ilk dəfə bazar günü açıq havaya çıxarılır. Deyir, ki bu gün ilk dəfə göyü üzünün nə qədər geniş, nə qədər mavi olduğunu görüm və etiramla kürəyimi torpağa dirəyib düşündüm: bu an hər şey cəhənnəmə, torpaq günəş və mən varamsa xoşbəxtəm.


Mən bir az dəyişiklik edəcək. Seymurun həbsi, onun həbsinə olan mətanətli reaksiyası, hökumətin böhtanına baxmayaraq sözün əsl mənasında xalqın ona sahib durmasını gördükdən sonra öz-özümə dedim. Cəhənnəm olsun, sizin o dəbdəbəli həyatınız, yaltaq və satqınlar ordusunun ehtişamı...Təkcə Seymur Hezi kimi dostu, əqidəşi olan adama heç nə lazım deyil, o bəxtiyardı!



İran filmləri

Bəri başdan vurğulamaq yerinə düşər ki, bəndeyi-həqirinizin film sənəti barədə öyünüləsi qabiliyyəti yoxdu. Bunun sadə səbəbi az film izləməyimdir. O az filmlər arasında qəlbimə iz salan İran filmləri barədə, icazənizlə, bir neçə kəlmə xidmətinizə ərz eləyim.
V.İ.Lenin Turgenev haqda yazarkən onun sənətkarlığını vurğulasa da, bir şeyi qəzəblə tənqid edirdi. Deyirdi ki, Turgenevin zədaganlığı ona həyatın acı üzünü olduğu kimi təsvir etməyə imkan vermir. Leninin iddiasına görə, Turgenev həyatın acılarını da çox bərbəzəkli, şümal təqdim etməklə reallığı təhrif edir.
İran filmləri Ulyanovun ürəyinə yağ kimi yaxılardı. Niyə?
Bu gün Məcid Məcidin Baran (Yağış) filmin izləyəndə buna qəlbən bir daha əmin oldum. Həmişə filmlərdə hətta kasıb qəhrəmanların kraxmallı, ütülü köynəklərin (özü də bəzən ağ rəngdə) görəndə başımdan tüstü çıxrdı. Bu hələ mahiyyət deyil, formadı. Yəni əksər filmlər, həyatı olduğu kimi təsvir etməkdə axsayır.
Amma qardaş, İran filmləri...(şübhəsiz mən bütün İran film sənayesini nəzərdə tutmuram. Bura "Sərçələrin mahnısı", "Bir ayrlıq hekayəsi", "Yağış", "Tehran-mənim satlıq şəhərim", "Cənnətin rəngi", "Səmanın uşaqları" və s aiddir)
Onları izləyən kimi adam gedir düşür həyatın düz içinə. Saxta gülüşlər, mənasız parlaqlığı həyatın özü əvəzləyir. Baxırsan və doymursan.
Baxdığım bu filmlərdə nəyi gördüm və nəyin altından qırmızı xətt çəkdim?
 Bu filmlər insanı təmkinə dəvət edir, bizə son dövrlər təlqin olunan, "nəyin bahasına olur, olsun qabağa get, çalış vuruş məqam sahibi ol" fəlsəfəsini rədd edir. İran filmləri sanki adama deyir: hara can atırsan ay bədbəxt, elə bilirsən qabaqda səbətdən gilas tökülüb, aram ol. Çalış yaxşılıq elə, qalanı boş şeydir.
Bu filmlər mənə eyni zamanda insanın acizliyini göstərir. Bəli, bütün dikbaşlıqlarımıza rəgmən həyat hər zaman öz yekə şapalağın kefi istəyəndə qulağımızın dibində cingildədir və deyir, sən qarşımda Firon ola bilməyəcəksən.
Siz də o filmlərə çalışın baxın.

27.11.14

Asif Yusiflinin həbsinin ardından

Möhtərəm qardaşım Asif Yusifli şübhəniz olmasın ki həbs olunacağını bilirdi. Çünki uzun müddət idi izlənilirdi, ətrafında əməliyyat tədbirləri qurulurdu. Bir neçə təxribatı çevik davranışı ilə dəf edə bilmişdi. Bunlar heç.
Asifi gözəl tanıyanlar onun üstün bir keyfiyyətinə bələddilər. 
O ən çətin halında belə kefin soruşanlara "yüksək səviyyədə" deyən adamdı. Əmənim, bizimlə yəni ictimaiyyətlə ilk birbaşa və ya bilavasitə təmasında da Asifin ilk mesajı "hər şey yüksək səviyyədədir" demək olacaq.
O, həm də bunu elə inandırıcı, sirayətedici formada deyir ki, müqavimət göstərməyə yer qalmır.
Potensial həbs təhlükəsi barədə o həmişə deyirdi ki, ölümdən çətindi ki. Mən bu həyata vəsiqəni iki dəfə almış adamam (Asif bəy həm müharibədə, həm də mülki həyatda çox ağır güllə və qəza yarası alıb). Onsuz indi yaşadığım artıqdı. 
Asif bəy mənəviyyatı möhkəm olan adamdı. Onu həbslə qorxutmaq, tankın üstünə qışqırmaq kimi bir şeydi.
Asif bəyi hz Yusif məqamına üz tutması münasibəti ilə təbrik edirəm. Bu Asif bəyə yaraşır!
Bunlar sizin üçün maraqlı olar...
Asif Yusifli peşəkar hüquqçu, qəhrəman döyüşçü, əqidəsi sabit cəbhəçi olmaqla yanaşı həm də istedadlı fikir sahibi idi. Çoxlarınız bəlkə də, xəbərsizdi, onun bir bloqu da var. Baş şüarını "zülm bitsin" formasında seçən Asif bəy bloqunda Azərbaycanda hökm sürən zülm və talana qarşı aydın, prinsipial yazılar həsr edib. Onun facebookdakı status və şərhlərin tənbəllik etməyib bir yerə yığsan, çağdaş Azərbaycanın mini səlmanəsi yaranar.
Son söhbətlərimizin birində vədləşmişdik ki, bloqunda daha məhsuldar olsun. O da demişdi ki, sağlamlığın qaydaya qoyan kimi xüsusən qazilərin hüquqları ilə bağlı sistematik yazıları olacaq.
Biz ümidimizi itirməmişik. O yazılar olacaq!
Asif bəyin bloqu budur http://asifyusifli.blogspot.com

20.11.14

O məscidə də büt qoyacaqlarmı?

Bu foto Tovuzun rayondakı bir məsciddən çəkilib







       

Bakıda İlham Əliyevin sərəncamı ilə hər birinin hündürlüyü 72 metr olacaq 4 minarədən və 55 metr hündürlüyündəki günbəzi olacaq məscid tikirlər.

Quranın Tövbə surəsinə istinad etsək, özünün müsəlman hesab edən şəxs orda namaz qılmamalıdır. Bunu bir kənara qoyduq.

Məni indi bu düşündürür: O məscidə Heydər Əliyevin büstü qoyulacaq, ya yox?

Zəruri qeyd.  Tövbə surəsindəki məlum ayələr

107. O kəslər ki, zərər vermək, küfr eləmək, möminlərin arasına təfriqə salmaq naminə məscid 3 tikirlər və öncə Allaha və Rəsuluna qarşı savaşmış olanın yolunu gözləyirlər, «Bir niyyətimiz yoxdu bizim yaxşılıqdan savayı» deyə and-aman edəcək onlar. Onların yalan dediyinə şahiddir Allah.
108. Nəbadə namaz qılasan orada. Daha yaxşı olardı ki, ilk gündən taqva naminə qurulmuş məsciddə namaz qılasan. Paklanmağı sevənlər gəlir buraya. Paklanan kəsləri sevər Allah.

18.11.14

Əli İnsanov barədə bir xatirəm

 Taledən kam almayan bir qohumumuz vardı. Pirani vaxtında tənha qalmışdı, övladları uzaq Rusiyada, özü isə Odlar Yurdunda canındakı min bir bəlayla çırpınırdı. Tez-tez qonağımız olardı. Ömrünü zəhmətlə keçirən bu adam dərin savaddan məhrum idi.
2001-ci ilin əvvəlində günlərin birində bizdə olarkən nəyə görəsə söhbət o vaxtkı səhiyyə naziri Əli Insanovun üstünə gəldi. Mən Insanov barədə ağır sözlər işlətdim.
Qoca mənə tərəf əyilib dəqiqləşdirmə apardı:
- Kimi deyirsən, bala?
- Əli Insanovu!
- Yox, yox, bala, elə demə sən Allah, o, çox insan adamdı...
Qoca qohumun etirazı məni çaşdırdı. Mən alovlu çıxış elədim, rejimi lənətlədim və onun əsas simalarından birinin də Insanov olduğunu dedim. Onda qoca qohumum bir neçə ay əvvəl Bakıda başına gələnləri danışdı.

Dedi ki, xəstəliyinə görə çox qapıları döyüb. Amma dərdini eşidən tapmayıb. Günlərin birində nazir Insanovun qəbuluna düşüb. Nazirlə ilk təmasda onun ürəyini fəth etmək üçün xəstə qoca divarda Heydər Əliyevin portretinə təriflər yağdırıb. Insanov onun sözünü ağzında saxlayıb və sərt formada deyib: “Otağı tərk elə, get, o şəkil səni müalicə eləsin”.
Qoca özünü itirib, baş verənləri analiz etməyə vaxt edincə, nazir yumşalıb və onu bir aylıq “Günəşli” sonatoriyasına yollayıb.

***
Mən o zaman bu hekayətə inanmadım. Yox, düşünmədim ki, qohumum özündən nəsə uydurur. Onun buna ehtiyacı yox idi. Sadəcə, mənə elə gəldi ki, Əli Insanovla yox, başqa biri ilə həmsöhbət olub.
Bir neçə il keçdi, artıq o qocanın həyatda olmadığı günlərdə Əli Insanov məhkəmə zalında Əliyevlərin ünvanına sərt tənqidlər səsləndirəndə barmağımı dişlədim. Deyəsən, qoca qohumum elə onun özü ilə danışıbmış. Hər halda, bunu indi təsdiq və ya təkzib edə biləcək bir adam qalıb - Əli Insanovun özü.
Əli Insanov barədə yazmağıma səbəb onun ictimai fəallara, müxalifət liderlərinə srağagünkü müraciətidir. O, xahiş edib ki, Avropa Məhkəməsinin qərarı əsasında işinə yenidən baxılacaq məhkəmə prosesinə diqqət ayrılsın.
O müraciəti oxuyanda, bir anda bütün bu söhbətlər, Əli Insanovun müxalifəti, azad mətbuatı asıb-kəsdiyi günlər lent kimi gözümün önündən keçdi. Qətiyyən, Əli Insanova indi tənə etmək fikrim yoxdur.
Onun məhkəməsini, məhkəmədən sonrakı davranışını diqqətlə izləməyim buna imkan vermir.
Insanov öz məhkəməsində Əliyev rejiminə çoxlarına örnək sayıla biləcək sarsıntı yaşatdı. Tabu mövzulardan, Paşayevlərin cah-cəlalından, Heydər Əliyev Fondunun maxinasiyalarından xalqı agah etdi. Üstəlik, keçmişdə azad mətbuat və müxalifətə qarşı davranışına görə üzrxahlıq elədi.
Gəlin, o məhkəmədəki çıxışın bir anını təzədən oxuyaq:
“Əli Insanov ixtiraçı alim olub, milyonlarla dollar qazanıb. Bu milyonlar YAP kimi yaramaz bir partiyanı maliyyələşdirib. Mən həbs olunanda YAP-ın 160 min üzvü vardı. Bu 160 min YAP-çı həmin partiyanın yaradıcılarından biri olan Əli Insanovun taleyinə baxıb nə nümunə götürəcək? 160 minlik YAP-dan nə gözləyirsiniz? Həmin o partiya özü əzəcək sizi. Əgər o partiyanın sədaqətli üzvünün taleyi budursa, bütün YAP-çılar bundan ibrət alsın...” (Ağır Cinayətlərə Dair Işlər üzrə Məhkəmə, 15 fevral 2007-ci il)
***
Əli Insanov mövzusu müxalifət düşərgəsində, müxalifətə simpatiya bəsləyənlər arasında birmənalı qarşılanmayan, polemikaya səbəb olanlardandı. Bəziləri müxalifəti Əli Insanovun hüquqlarını müdafiə etdiyinə görə qınayır. Məncə, bu barədə açıq və səmərəli müzakirə getməlidir.
Birincisi, heç kim Əli Insanovun məsumluğunu iddia eləmir, onun səhvləri, cinayətləri belə olub. Ancaq əməllərə görə, siz necə düşünürsüz, Əli Insanovu asmalıdılar? Yaşlı, sağlıq problemi yaşayan, elm adamı, ictimai xadim olan bir adama həmin cinayətlərə, səhvlərə görə 8 illik cəza bəs deyil?
Əli Insanov siyasi məhbusdur, onun istintaqı, məhkəməsi ciddi qanun pozuntusuyla keçirilib və bu artıq Avropa Məhkəməsi səviyyəsində sübut olunub.
Ötən müddətdə bir daha aydın oldu ki, Əli Insanovun işdən çıxarılıb həbsə atılması qətiyyən Əliyevin səhiyyəyə, ölkə vətəndaşlarının sağlamlığının qeydinə qalmasına görə baş verməyib. Belə olsaydı, Şirəliyevin dövründə xəstəxanalar açıq bazara çevrilməzdi, apteklərə verilən lisenziyalar üçün tələb olunan rüşvət azı 3 dəfə artmazdı, mərəzə yoluxan vətəndaşlarımızın Irana, Turana kollektiv axını olmazdı.
Ikincisi, Əli Insanov müxalifətin bir çox siyasi məhbusları kimi, nümunəvi dustaq həyatı yaşadı və yaşayır. O, Əliyevlərin israrına baxmayaraq, bu gün də əfv ərizəsi yazmaqdan imtina edir, saxlanma şəraitinin və sağlamlığının bərbad olmasına rəğmən, mətanətli mövqe nümayiş etdirir.
Müxalifət düşərgəsi önündə heç bir öhdəliyi olmasa da, vicdanlı mövqe göstərib bütün həssas məqamlarda həbsdən müxalifətin yaratdığı qurumlara dəstəyini ifadə edir. Neyçün bütün bu nəcib hərəkətlər cavabsız buraxılmalıdır?
***
Başa düşürəm, bizim adamlarda “ilan vuran ala çatıdan qorxar” ehtiyatlılığı var. Onlar düşünür ki, Əli Insanovu müdafiə edəcəyik, o da azad olunan kimi Fəxri Xiyabana gedib məlum məzara baş əyəcək. Bəlkə də belə olacaq, mən olmamasına qarantiya verə bilmərəm. Ancaq bu da düz deyil ki, insanı bugünkü mövqeyinə görə yox, etimal olunan hərəkətlərinə görə qiymətləndirək. Nə problem var, Insanov azadlığa çıxandan sonra hansısa xoşagəlməz addımlar atsa, onu tənqid etmək imkanını bizim əlimizdən kim alır?
Bu qədər uzunçuluq etməkdə demək istədiyim budur ki, mən Əli Insanovla bağlı məsələni diqqətdə saxlayacağam. Ümid edirəm ki, 2007-ci ildə məhkəmədə göstərdiyi parlaq çıxışlarla yenidən xalqımızın atəşli qəlbinə su səpəcək.

(`Azadlıq` qəzeti 18 NOYABR 2013 )

21.10.14

Heydər Əliyevin heykəlinə baş əymə

Zeif müxalif helqeleri Heyder Aliyevin heykeline, goruna baş eydirmekle İlham Aliyev ne demek isteyir? Bu elbette güc ve qüdret nümayişi sayıla bilmez; hetta jale şiresi içen mirzeler bele bu tamaşaya göre eliyevçi rejimi lenetleyirse demek iş alınmayıb.
Bes nedir bu?
Mence, oğul Eliyev şüuraltı ezabların bu cür yollarla yüngülleşdirmek ister. Hansı ezabı, yazıram?
Bilirsiniz bunu atası kommunist partiyasında uzun iller emek verib. Sonra daxili isteyi ile yox, konyuktura üçün eqidesini deyişib.


Yeni eqideni ise o özü müeyyen etmeyib. Bizim yolunu davam etdirdiyimiz azman kişilerin ucaltdığı bayrağa, beyan etdiyi ideyaya sığınıb. Belelikle, uzun müddetdir ata-oğul eliyevler eslinde daxılen sınaraq bizim o eqidemiz qarşısında diz çökür; dişi bağırsağın kesse de yolunda feda olduğumuz o üç renglî bayrağın altında dayanır!
Ve bu onları yandırır.

Aydın olması üçün xüsusen vurğulayıram; bir dövlet rehberinin milli bayraq önünde eyilmesi qürura müxalif bir şey deyil. Feqet, bu qesbkar hakimiyyetin o bayrağa dexili yoxdu; o bayraqdaki üç deyerin üçüne de bunlar düşmendi. Ona göre onlar her defe bu bayraq önünde eyilende özlerini alçalmış sayırlar ve bunun qisasın hele sümüyü berkimemiş insanlarımızdan alırlar.

Yazıklar olsun!

18.10.14

Əfv ərizəsindən sonrakı həyat

Möhtərəm dostlar!
Əfv ərizəsi yazanlar barədə bizim fərqli fikirlərimiz olsa da zənnimcə bir məqamda hamımız eyni rəydəyik.
Bu rəy də ondan ibarətidir ki, deyirik, məhbuslar o ərizələri öz ürəklərinin səsi ilə yamayıb, müxtəlif mənəvi-fiziki işgəncənin təsirindən yazıb.
Onu da deyirik ki, necə ki düşmən əsirliyində, girovluğunda olan adamın canını qurtarması üçün yazdığı, danışdığı fikirlər əsassızdı, bunlara da elə yanaşmaq lazımdı.
Fəqət...Möhtərəm dostlar, hamımız şahidik ki əsirlikdən, girovluqdan ana yurda dönən adamlar o iradələrinə zidd olan fikirləri hansı işgəncələr altında dediyini rahat da olmasa, danışa bilir, bu haqda müsahibə verir, bəzisi hətta kitab da yazır.
İndi görün əliyevçi rejim necə amansızdı ki, biz bu vaxta qədər əfv yazan adamın o əfvi hansı mənəvi-fiziki təhdidlər, işgəncələr altında yazdırılması barədə danışdıqlarına, yazdıqların rast gəlmirik. Bu o deməkdi ki, Azərbaycanda azadlıq çox şərti söhbətdi, "çöl də bayıl kimidir". Çöldə də risk, təhlükə elə içəridəki qədərdi.
Allahın rəhmət və bərəkəti zindanda hz Yusif məqamı yaşayan qardaşlarımızla olsun!

28.9.14

Dəlilik xilas yolu kimi

Murad Ədilov
Bir yoldaş var. Siyasətlə bağlılığı çox azdı, ona görə də siyasi məhbus, vicdan məhbusu teması ona yaddı.
Onunla belə qısa və maraqlı söhbətimiz alındı.
Murad (türmədəki qardaşım, avqustda şərlənərək həbs edilib) necədi?
- Normal, türmədir də.
- Qurtarmaq istəmirsən?
-İstəyirəm, amma necə?
- Sən belə elə, ona dəlilik kağızı al.
O bu sözləri tam ciddi dedi və qınanılası da deyil. İndi Azərbaycanda müxtəlif cinayətlərdən qurtarmaq üçün saxta yolla dəlilik kağızı almaq moddadı.
Ağılın iqnor edildiyi zamandayıq.

2.9.14

Necə oldu Seymur Həzi "cinayətə" qurşandı?

Natiq Ədilov: “Azərbaycan saatı”nın dayanmasından söhbət gedə bilməz”“Bizim ölkədə düzgün həyat tərzinin özü cinayət sayılır və qardaşımız Seymur belə “cinayətə bulaşıb”

AXCP mətbuat xidmətinin rəhbəri Natiq Ədilov partiyanın Rəyasət Heyətinin üzvü, “Azadlıq” qəzetinin şöbə müdiri, “Azərbaycan saatı” televiziya proqramının redaktoru və aparıcısı Seymur Həzinin həbsi ilə bağlı “islamazeri.az” internet qəzetinin suallarına cavab verib. Müsahibəni təqdim edirik.
– Seymur Həzinin həbsinin arxasında nə dayanır?
– Məncə, artıq Seymur Həzini tanıyan hər kəs üçün bu sualın cavabı aydınlaşıb. Ona görə bu sualın cavabına çox vaxt itirməyək. Həbsin arxasında məkr var, hiylə var, azad sözə, ədalətə, düzgünlüyə qarşı düşmənçilik dayanıb. Seymur lap yeniyetmə vaxtından ölkənin səadəti, firavanlığı, demokratikliyi üçün çalışan insandı. Yazıları ilə, fəaliyyəti ilə daima Azərbaycanda haqqın öz yerini tapması üçün mübarizə aparıb. Çox təəssüf ki, bizim ölkədə düzgün həyat tərzinin özü cinayət sayılır və qardaşımız Seymur belə “cinayətə bulaşıb”.
– Seymur Həzi “Azərbaycan saatı” verilişinin aparıcısı idi. Onun saxlanılması “Azərbaycan saatı” verilişinə hansısa təsir göstərəcəkmi?
– Bəli, Seymur, AXCP Rəyasət Heyətində, Milli Şurada və “Azadlıq” qəzetinin yaradıcı heyətində təmsil olmaqla yanaşı, “Azərbaycan saatı” teleproqramında da var. Teleproqramın əsas simalarından biridir. Bu həbs əlbəttə, bir Seymur Həzi boşluğu yaradacaq. Tamaşaçılar hər həftə onu görə bilməyəcəklər. Amma verilişin dayanmasından söz gedə bilməz. Bu proqramın qurucusu Qənimət Zahiddi və o, elə mükəmməl forma qurub ki, “Azərbaycan saatı” sanki daimi mühərrikdi. Hansısa əməkdaşın tutulması Azərbaycan efir məkanında azad və tənqidçi sözü deyən bu yeganə proqrama son qoya bilməyəcək. Bizim çoxlu kadr bazamız var, Seymurdan sonra proqramın yaradıcı heyətində təmsil olunmaq üçün xeyli sayda insan müraciət edib. Onlar həm ölkədədir, həm də xaricdə. Elə ötən bazar proqramımızı dəyərli jurnalist xanımlarımızdan Xədicə İsmayıl və Təhminə Tağızadə apardı və xeyli də təqdir gördülər. Bu proses davam edəcək.
– Son zamanlar Azərbaycanda ictimai fəalların həbs olunmasını nə ilə əlaqələndirirsiniz?
– Bu həbslər müvəqqəti xarakter daşıyır. Dünyada baş verən bir neçə qlobal proses Azərbaycan hakimiyyətinin əlini açıb. Onlar da gələn il ölkədə gözlənilən dəyişiklik fürsətini indidən zərərsizləşdirmək istəyirlər. Həbs olunanların hamısına qarşı böyük ictimai canıyananlıq var və bu özü göstərir ki, hakimiyyətin narkoman, xuliqan, vətən xaini deyib şərlədiyi adamların hörməti hakimiyyətdəkilərin cəmisinin hörmətindən çoxdu. Deməli, bu repressiyalar hələ 5 dəfə də güclənsə, şərin təntənəsini düşünənlər üçün heç bir xoş xəbər yoxdu. Bu yol süquta məhkumdu. Azərbaycan hakimiyyəti Firondan, Stalindən güclü deyil, onlar qədər repressiya aparmaq gücü də yoxdu. Onlar sonacan duruş gətirə bilməyibsə, bu diktatura karikaturaları necə gətirsin? Biz tezliklə Azərbaycanda tam tərs proseslərə şahid olacağıq. Mən optimistəm və bu halım tarixi qanuna uyğunluqlara söykənir.

24.8.14

YAPI kreditin yabılığı haqqında

YAPI kredit redaksiyamızdakı əməkdaşlar üçün wordkart paylamışdı. Birini də mən götürdüm, işlətdim. ABŞ gedəndə bəlli səbəbdən ödəmə edə bilmədim, 3 ay gecikmə oldu. Odlar Yurduna enər enməz mənə zəng etdilər. İki dəfə izahat verdim, telefonda. Dedim, ölkədə olmamışam, krediti ödəməklə bağlı narahat olmayın. Ölkədə olmadığıma dair sübut filan istəyirsinizsə təqdim etməyə hazıram.
İki dəfə belə danışıq oldu. Cavab tək idi, müəllim, problem yoxdu 95 manat ödəyin vəssalam.

Getdim bankın Elmlərdəki filalına, darısqal yerdə uzun növbədə azı 40 dəqiqə gözləyəndən sonra həmsöhbətim olan işçidən soruşuram.

- Əfəndim, mən indi 95 manat ödəməliyəm. Olarmı, növbəti ayları da indidən, qabaqcadan ödəyim.

- Bəli, olar, məmnun qalardıq.

- Əfəndim, bu ödəməni etsəm katrdakı istifadə edəcəyim məbləğ nə qədər olacaq.


- 700 manat, müəllim.

-Çox gözəl, çox pakizə. O zaman öncədən ödəmə edirəm, hamısını. Yazın!
Yazır, kağızı götürüb kassada ödəyib çıxıram.


İşə gəlirəm. Kartla bir əməliyyat etməliyəm. Bir dəfə, beş dəfə yoxlayıram alınmır. Banka zəng edirəm.
- Yoldaşlar, sizin kart işləmədi axı...

-Müəllim düzdü, çünki sizin kart işləməməlidir. Çünki sizdə gecikmə var.

- Dostlar, axı mən nəinki gecikməni, hətta qarşıdakı aylarda olan borcumu da indicə ödəmişəm, bu da qəbz filan...
Dəstəyin o tərəfindəki xanım, hara iləsə uzun-uzadı məsləhətləşir sonra deyir. Üzr istəyirik, sizin kart bloklanıb, onun açılması üçün ərizə yazmalısınız...

-Lənət şeytana, nə ərizə. Mən iki dəfə sizin əməkdaşlara telefonla izahat vermişəm. BU ərizə vacib idisə niyə məni ofisinizdə 1 saat gözlədəndə yazdırmırdınız...

- Bağışlayın ki, belə alındı, amma mütləq ərizə yazmalısınız.

- Axı siz məni ələ salmısınız, sizə ərizə lazımdırsa gəlin alın. Mən ödəməni də eləmişəm, borcu da bağlamışam. Kart bloklanırdısa niyə məndən hələ qarşıdakı aylarda ödəcəyim pulu alırdınız. Niyə mən bloklanma barədə əvvəlcədən məlumatlandırımamışam.
Cavab yoxdu, qız ancaq deyir ki, gəlin ofisə ərizə yazın kartınız açılsın. Başa sala bilmirəm ki mənə indi əlimyandıda pul lazımdı, onu da karta qoymuşam, kartı da bloklamısınız.
***
Səhəri gün (9 avqust) Səbail rayonundakı mərkəzi ofisə gedib izahat yazıram. Məni qəbul edən xanım deyir ki, 3 günə sizə cavab veriləcək.
3 gün 5 gün olur cavab yoxdu. Zəng edirəm.
- Müəllim, müraciətiniz qeydə alındı sizə cavab verəcəyik.
Ərizədən iki həftə keçir. Yapıkeditdən hələ də cavab yoxdu.

***
Dostlar, bu necə bir hadisədi. Bu ancaq məmin başıma gələn qəzadır, yoxsa yapıkredit deyilən bank elə bu cür işləyir. Yoxsa, burda anormal heç nə yoxdu?

Mən bank tərəfindən özümü aldadılmış sayıram. Onların üst qurumu haradır, Milli Banka bu yöndə şikayət etmək olarmı.
Yoxsa, dost tanışı bu yapsifət bankı baykota çağırmaqla söhbəti nöqtələyək?

3.7.14

Amerikada "ziyarətgahlar"

Әziz dostlar, bitməkdə olan bu günümü əlamətdar sayıram.
Xəyal saydığım bir çox şeyləri reallaşdırdım. Obrazlı desək, müasir elmin ən müqəddəs ziyarətgahların bir-bir ayaqdan keçirdim. İndi rahatlıqla özümə elm hacısı deyə bilərəm:)
İndi o yerlərdən çəkdiyim bəzi fotoları paylaşıram.

 hp kampaniyası. illik geliri Azerbaycanın büdcesinden texminen 6 defe çoxdu. Şirketde ele bir sessizlik hakimdi ki, nece deyerler sessizlikden quş qanad salır.

Yeni texnologiyanın tapılması, araşdırılması üçün hp ilde 3,5 milyard xercleyir.


 ABŞ-ın en qedimi şirketlerinden olan -Motorolla 

 NASA (ing. National Aeronautics and Space Administration; "Milli Aeronavtika və Kosmos İdarəsi") — ABŞ-ın mülki kosmik proqramlarını həyata keçirmək üçün yaradılmış icraedici dövlət agentliyi.

NASA, 1958-ci ilin fevralında yaradılmış Aeronavtika üzrə Milli Məşvərət Komitəsinin (NACA) xələfidir. NASA-nın 2006-cı ilin fevral ayında qəbul edilmiş missiyası "Kosmik tədqiqadlarda və elmi kəşflərdə aparıcı rol oynamaq"dır. NASA-nın həyata keçirdiyi elmi tədqiqatlar əsasən Yer Müşahidə Sistemi vasitəsilə Yer planetini daha yaxşı tədqiq etmək, heliofizika və astrofizika elmlərini daha dərindən öyrənmək və avtomatlaşdırılmış sistemlər vasitəsilə Günəş sisteminə daxil olan fəza cisimlərini kəşf etmək işlərini əhatə edir. NASA-nın 18 min nəfər əməkdaşı vardır və agentlik əldə etdiyi məlumatları tez-tez başqa ölkədaxili və beynəlxalq təşkilatlarla paylaşır.

Menbe: wikipedia
 Microsoft şirketi (Microsoft Corporation, oxunuşu: "Maykrosoft")
Dünyada ən böyük 2 transmilli şirkətlərdən biri. Müxtəlif hesablama sistemləri üçün proqram təminatlarının istehsalı ilə məşğul olur.
 
Microsoft Şirkətinin sahibi Bill Gates'dir(Bill Geyts). Microsoft şirkətini dünyaca məşhur edən bu adam həm də dünyanın ən zəngin adamıdır. Bank hesabında təqribən 1000 000 000 $ vardır. İndi Microsoft şirkəti Windows Əməliyyat Sistemlərini istehsal edir.

Microsoft şirkətinin məhsulları 45 dilə çevrilərək, 80 ölkədə satılır.
(Menbe: wikipedia)
 
Amazon şirketi.
Bu şirkete sözün esl menasında divdi. hesablamalara göre ABŞda online xerclenen her 3 dollardan biri Amazona gelir. Amazon vasitesi ile insanlar internet üzerinden alış veriş edirşer. Amerkanlar artıq yeyib içmeyi de Amazondan sifariş verir.
Şirket hörmetliliyine ve etibarlığına göre dünyada ve ABŞ-da hemişe ilk beşlikde olub,

27.6.14

Şahla əl tutan azərbaycanlı

İran şahı Rza Əziz Abbası "idmanın inkişafına xidmət" medalı ilə mükafatlandırı
“Gözlərinin qadasın alaram, bu ölkə pisin pisi, yaxşısının ən yaxşısı var. Qalır sənin onların hansısnı seçməyin. Bir də bu ölkə ailənin düşmənidi. Bax mənə, mən yox e, arvadım məni boşadı getdi. İndi uşaqlarımın da hərəsi bir yandadı. Bir qızın gecələr gəlir mənlə qalır”.
Həmsöhbətim 88 yaşlı gimnastdı. Əziz Abad. Onu mənə belə tanıtmışdılar ki, İranın devrilən şahı Məhəmməd Rzanın mühafizəçisi olub. Dərhal nömrəsini tapdım, danışıb müsahibə istədim vaxt aldım.

Onunla Kalifoniyanın Walnut Creek şəhərindəki imkansızlar üçün tikilən sakit və gözəl mənzilində görüşdük. (ABŞ-da belə evdə yaşamaq haqqı o adam qazanır ki illik gəliri 40 min dollardan aşağı olsun).
Mənə verilən informasiya düz çıxmadı. Adam şahın mühafizəçisi olmayıb, sadəcə bizim camaatı bilirsiz də, samanı Zaman edənlərdənik. Ancaq bu 88 yaşlı insanın həyatına ötəri nəzər salanda görürsən ki, şah oldu olmadı, onun ömürü sanballı bir romandı.  Gəlin, o “romandan” bir neçə səhifə vərəqləyək.
Quru və rəsmi bioqrafiyanı belə icmal edə bilərik. Əzizin ana anası bolşevik inqilabından sonra Bakıya gəlib.

ABŞ-da "imkansızlar" üçün ev
  O Bakıda doğulub. Yuxarı Dağlı məhəlləsində 6 nömrəli məktəbə gedib, məktəb vaxtından gimnastika ilə məşğul olub. 1937-ci il repressiyaları bu ailədən də yan keçmir, onun atasın bir il həbs edirlər. Sonra ou buraxırlar, başqa iranlılarla birgə üstüaçıq gəmi ilə İrana yollayırlar.
Əziz burda da idmanın davam edir və bu sahədə uğurları böyük olur. 58-ci ildə Moskvada keçirilən giminastların dünya çempionatında, daha sonra Yaponiyada keçirilən  olimpiya oyunlarında İranı təmsil edəcək qədər peşəkarlaşır.  Bununla da onun Şahla təması başlayır. Danışır ki, şah ildə iki dəfə Novruz Bayramında və ad günündə idmançıları qəbul edərmiş. Bu görüşlərdə şahdan xüsusi diqqət gördüyünü deyir müsahibim. Babalı öz boynuna əlavə edir ki, şah onu açıq sözlü kimi tanıyırmış, ona görə yanına çağırıb soruşurmuş ki, sən o tərəfdən gəlmisən, inqilabçı balasısan de görüm, filan işi görürəm, camaat necə qarşılayır filan.
İran İslam İnqilabından az sonra Əziz Abad ABŞ-a gəlir. 4 ildən sonra o ailəsini ABŞ-a gətirir. Onun 7 uşağı var. İllər keçir arvadı uşaqlarını da götürüb Əzizdən ayrılır. O, bu məsələni ABŞ-ın qadınlara verdiyi ifrat azadlıqla əlaqələndirir. “Sənin həddin nədi arvada nəsə deyəsən. Mənim xanımım da bir gün belə məni boşadı. Hə, mən yox, o məni”.
Təxminən 5 il əvvəl Əziz bəy həyətlərində ağlayan bir Zaqafqazilayı rus zənənlə tanış olur. Evə gətirib onu özünə arvad edir. Amma bu zənən də vətəndaşlıq alan kimi evdən qaçır. Bunarı qoyaq bir qırağa...
Əziz bəy, yuxarıda yazdım, dövlətin onun kimilər üçün ayrıdığı evdə yaşayır. Bu ev üçün o ayda 200 dollar kirə haqqı verir. Çox deyil, nəzərə alın ki o ayda 5 min dollar  pensiya alır. Bu yaşlı bir kişinin evinə heyran olmamaq mümkünsüz. Heç yuxunuzda da görə bilməzsiniz ki, birincisi Bakıda bu yaşda adam qalsın, ikincisi bu yaşda adam evinə xüsusi dizayn versin.
Necə br dizayn, onu da yazım.

Birincisi, divarda onun ömür yolunu əks etdirən əlamətdar foto stent var. Bundan başqa evin içində o ailə muzeyi yaradıb. Atasının qəlyanın, anasının simovarın və s şeyləri ora düzüb.
Evin divarında ata anasının fotosu ilə yanaşı əsas üçn dinin simvollarını da vurub.Kitabxanasının başında Quran, Tövrat, İncili (1982-ci ildə ABŞ-da azərbaycanca çıxan bu İncilin tərcüməçisi tanıdığımız Mirzə Xəzərdi).
atasından qalma qəlyan
Dini baxışları barədə qısa söz açan Əziz bəy mənə bir fars məsəlini çəkir.
 Bu təqribən bizim “palaza bürün ellə sürün” deiminə təndir: istəyirsən rahat yaşayasan camaatla heç bir məsələdə müxaliflik eləmə.
O deyir ki, elə bu müxaliflikdən qaçmaq üçün uşaqlığından namaz da qılıb. Amma onu biz hər hansı formada dindar, din düşüncəlis aya bilmərik. 

Adam bütün dinləri qəbul edir, deyir əsas məsələ “yaxşı düşünün, yaşxı danışıb, yaxşı əməl etməkdir”.
Onun evimində divardan vurulan Zeynəb xanlarovanın fotosu diqqətimi çəkdi. Bir də baxıram ki, stolun üstündəki podnosda da Zeynəb Xanlarovanın rəsmi.
“Biz Zeynəbi çox sevərək. Rəhmətlik anam parkinson xəstəsi idi. Zeynəbin konserti idi, apardım düz qabaqda oturtdum. Əllərini əsməkdən güclə saxlayan anam Zeynəbin oxuduğu bu bayatını
“Dağları gəzdim gəldim
Daşları düzdüm gəldim
Yarı bivəfa gördüm
əlimi üzdüm gəldim” eşidən kimi qoy götürdü. Hamımız heyrət elədik. Zeynəb də gəldi anamla görüşdü. Bakıya dəvət elədi bizi...

Söhbətin davamın sabah edərik, indi yorğunam
J









22.6.14

Qardaşım, sən azadsan! (Tale Bağırzadə üçün)

İyulun 23-ü əziz və qiymətli dostum, vicdan məhbusu Tale Baqirzadenin ad günüdür.
O yenə də ad günün ( deyəsən 4-cü dəfədi) giramı balası, əzizləri ilə deyil zindanda qarşılayacaq. Olsun. Nə mən, nə də Tale bəy bundan narahat deyil. O işini bilən insandı. Çıxdığı yolun tikanlı olduğunu çoxdan bilir, ayağını da heç sevmir. (Bizim yol tikanlıdır, ayağını sevən gəlməsin (c))

Tale bəy, Azərbaycanda tərəddüdsüz tərifləyə bildiyim qardaşlardandı. Allah ona gözəl əxlaq, mərifət, təvəzökarlığı bol-bol əta edib.

Ölkədə yezidlərin hökumran olduğu halda belə bir insanın həbsdə olması qədər təbii nə ola bilər ki.
Mən bir dəfə Türkiyəli bir vicdan məhbsus barədə dostunun yazdığı bir fikiri oxumuşdum. Deyirdi, hocam sənin ora hansı səbəbdən düşdüyünü bilirəm, amma səni ordan necə çıxarmağı bilmirəm.

Mənsə Tale Bağırzadə və onun kimi əziz vicdan məhbsularını zalımın cəngəsindən qurtarmağın yolunu yaxşı bilirəm. BU yol çox sadədir. Sadəcə cəsarət istəyir. O cəsarəti ki, biz zalıma zalım, məzluma məzlum deyə bilək.

Əzizim Tale, səni təbrik edirəm indidən. Allah səndən izzət və cəlalın kəm etməsin. Gözlərindən öpürəm.

Qardaşın Natiq.
Sonda qoy sözləri Seyyid Kutubun "əxi əntə hürrün" (qardaşım sən azadsan) mahnısı sənə hədiyyəm olsun. Kaş ki bunu dinləyə biləydin.


21.6.14

ABŞ polis dövlətidir

Amerika qeydləri (əvvəli burda)

Başlıq sizi çaşdırmasın. Bizdə polis, polis dövləti haqlı olaraq pis başa düşülür. Çünki polis bizdə ədalətsizliyin, zorakılığın simvoludur. O hüquq mühafizə orqanından çox hakimiyyət ailənin maraqlarını güdən qolu-zorlu, mədəniyyət və nəzakətdən yetim qurum kimi qarşılanılır.
ABŞ-da vəziyyət fərqlidir. Bəli, ABŞ-da da polisin vətəndaşlara qarşı zorakılıq etdiyi hallar var və mediada bu barədə xəbərlər vaxtaşırı çıxır. Ancaq bu epizodik hallardı və polisin özbaşınalığın burda nə dövlət həzm edir, hə cəmiyyət.
Qanunsuzluq edən polisi qara günlər gözləyir, onun iş karierasında da, şəxsi həyatında da bu hadisə qara yara kimi qalır.
ABŞ-da polisə insanların hədsiz güvəni var. Polis insanlar üçün gərəkli bir dostdur, çətinə düşəndə gözü axtardığı ünvandır. Nümunələrlə çalışacam vəziyyəti göstərim.

Birincisi, amerkan vətəndaşları bizim ilk baxışda "işverən" kimi qəbul edəcəyimiz həyat tərzinə cani-könül veriblər. Yəni, amerikada yaşayırsızsa unutmamalısınız ki, üzərinizdə şiddətli bir ictimai nəzarət var, dişinizi belə qanunsuz formada qurdalasanız ətrafınızdan beş on nəfər tapılacaq ki, bunu polisə xəbərləsin.
İnsanlar bunu özləri üçün əskiklik yox, əksinə şərəf sayırlar. Adamlar polislə əməkdaşlıqdan məmnundular. Çünki, burda hamı əmindir ki, "mənim polissim məni qoruyur".

Polis bizdəki kimi hər yerdə gözə girmir, sənin daşına hər an dəyənəyini endirəcək tərzdə olmur, fəqət ABŞ polisi doğrudan da hər yerdədi. Sakit və gözədəymədən. Siz 911-ə harda olsanız zəng edin, sıxıntınızı bildirin 5 dəqiqəyə polis yanınızdadı.

Adamlar ən müxtəlif məsələyə görə polisə üz tutur. Məsələn, mənə danışmışdılar ki, bir nəfər azərbaycanlı yoldaş ilk dəfə marixuana çəkib, hallunasiyaya girib. Götürüb polisə zəng edib ki, pisəm. Polis gəlib, görüb ciddi bir şey yoxdu, sadəcə məsləhət verib ki, qardaş "barıtı bu qədər çox eləməzlər də".

***
Başqa bir dostum rəvəyət edir ki, günlərin birində gecə (saat 22-dən sonra) evdə zövcəsi ilə hansısa məsələyə görə bir az uca səslə danışıb. Bir də görüb ki qapı şiddətlə döyülür. Qapını açıb, polis! işin çaşlığından onun oturduğu divanda bıçaq da olub. Polis salamsız filansız evin kişisiniz dərhal qandallayıb.
Polis bizim hər gün evimizdə alışıq olduğumuz uca səslə müzakirəni ailə münaqişəsi kimi qiymətləndirib və buna görə də ailə üzvlərinin hər birini ayrı-ayrılıqda 15-20 dəqiqə intervyü edib. Axırda görüb ki, bir problem yoxdu, üzr istəyib gedib.

***
İkinci hadisə öz başıma gəldi. Kaliforniyada bir dostumun qonağı idim. Axşamlar balkona çıxıb söhbət edirdik. İkinci gün polis gəldi. Bizdən xahiş elədi ki, şikayət var, gecə olduğun nəzərə alın, qonşulara xatir keçin evdə danışın.
Sizi tam əmin edə bilərəm ki, biz eyvanda nə ulayırdıq, nə qışqırırdıq. Elə belə, gündəlik alışdığımız formada söhbət edirdi. Uzaqbaşı arada gülüş filan olardı.

***
Ən maraqlısı budur ki, polisin bəzən sizə dəxlisiz formada həyatınıza müdaxilə eləməsindən insanlar incik deyil. Onlar bunu anlayışla qarşılayır. Çünki, deyirlər ki, axı bu müdaxilələrdə polisin heç bir marağı yoxdu, o bizdəki kimi hər şikayətə görə 5-10 manat qazanc güdmür. O bunu citimai təhlükəsizlik və rahatlıq üçün edir.

***
Bütün bunları ona görə yazdım ki, Qərbi, ABŞ əxlaqsız, mənəviyyatsız sayan polislər və elə sadə adamlarımız da Bakıda yaşayış binalarının alt qatında gecə-səhərə qədər açıq fəaliyyət göstərən səs-küylü barları, fahişəxanaları, çay evlərin də düşünsünlər,Ondan sonra birlikdə deyək: bəlkə bir az yavaşlayaq :)

ABŞ-da təsvir etdiklərimi də.

ABŞ: ucuz və keyfiyyətli


ABŞ qeydləri

Hər dəfə Azərbaycandan qərb ölkələrinə çıxanda böyük hərflərlə bu fikiri yazmağı vacib bilirəm: Demokratiya həm də ucuz və keyfiyyətli yaşayış imkanıdır.
Mən şahidəm; bizim ölkədə insanlar bir mövsümdən çıxıb o birinə girəndə üst-başını təzələmək üçün müsibət yaşayır. Cavan uşaqlar bir normal şalvar, ayaqqabı almaq üçün az qala qatil olurlar. Ola bilər mən bir az ifrata varıram, ancaq siz də insaflı olun, deyin ki, Natiq, ölənlərin rəhmət doğrudan da bizdə bahaçılıqdı; qiymətlərlə ayaqlaşmaq olmur.


Bunu deməsəniz belə heç nə dəyişməyəcək, Azərbaycanda əmək haqlarının əhəmiyyətli hissəsi ərzaq və gündəlik təlabat mallarına gedir və bu mötəbər iqtisadi araşdırmalarda əksini tapıb.
O da var ki biz hələ bir ətək pul verib aldığımız malın keyfiyyətindən bədgümanıq. Hər dəfə mal alanda şəxsən mən düşünürəm ki, İlahi görəsən, bu dəfə nə qədər aldadıldım...
Bəli, Əliyevlərin kəraməti ucbatından vəziyyət elə gətirib ki, ölkəmiziə diş çöpü də Konqodan zaddan gəlir. Xaricdən gələn mallar da ya çox keyfiyyətsiz olur, ya da çox baha.

Bu iki amilə də səbəb gömrükdə, vergilərdə olan talan, monopoliya və korrpusiyanın varlığıdır. Əliyev hakimiyyəti nə özü bizə vəzifəsi olaraq umac ovur, nə də bunu öz gücünə görən adamlara imkan verir. Bunun da zərbəsin sən, mən dadırıq.
Gəlirik, mövzumuzun şirin və həyəcanlı yerinə.
ABŞ bildiyiniz kimi zəngin insanların məkanıdır. Burda azca ağılın olmağı kifayətdir ki, aya 2-3 min dolları rahatlıqla, heç bir əziyyət çəkmədən, ləyaqətli formada qazanasan. Bu minimal həddir. Nəzərə alın burda qadınlar da əksərən işləyir, özü də çox yaxşı məvacibə, bu isə o deməkdir ki orta statistik amerikalının ailəsinə ayda 8-10 min dollar gəlir.

İndi sizin bəzininz deyəcəksiniz ki, əşi nolsun eee, orda qiymətlər də bahadır. Dostlar, bu nağıldır. Başa düşürsüzmü, nağıl!
Mən o nağılı təkzib etmək üçün hüzurunuza foto-faktlar təqdim edirim. Siz bu fotolarda "Walmart" mağazalar şəbəkəsində bəzi geyim əşyalarının qiymətini görəcəksiniz. O qiymətlərə diqqətlə baxın amerikalıların və öz maaşınızı da düşünün, axırda gördüyünüz malların Azərbaycandakı qiymətlərini də göz önündən keçirin.
Bunu da unutmayın; ABŞ-da qeyd etdiyim və buna oxşar şəbəkələrdə keyfiyyətsiz, dövlətin müəyyən etdiyi ağlabatan standartlara cavab verməyən mallar satıla bilməz. Bu son cümləni ona görə yazmağı vacib saydım ki, deyən olmasın ki, əşi bekara, keyfiyyətsiz mallardır da.

Beləliklə biz mövzumuzu belə yekunlaşdıra bilərik.
Əziz Azərbaycan insanı, demokratiya təkcə ona görə deyil ki, Natiq, Məmməd çıxıb gündə mitinq edəcək, debatlarda bəlağətli çıxışlar edəcək və s.
Demokratiya və azadlıq həm də ona görə lazımdır ki, sən, siyasətə qarışmayan sən belə ucuz və keyfiyyətli həyatla təmin olasan. ABŞ-a bu zövqü-səfanı yaşadan mübhəm bir sirr deyil, azadlıq və demokrayiyadır.


20.6.14

Kim sevirsə İlhamı...

Bizim dostlardan biri bir atalar sözü düzəltmişdi: Kim sevirsə idmanı, demək sevir İlhamı.
İronik formada icad olunan bu atalar sözünün məğzində Əliyev hakimiyyətinin apardığı ucuz (əslində isə maliyyə baxımından çox bahalı və xərc aparan) idman təbliğatına etiraz dayanırdı.
İdman, can sağlamlığı insan üçün vacib əhəmiyyət daşıyır, indi durub onun faydası barədə uzun uzadı cümlələr qursaq, bu vaxt itkisi olar. İdmanın əleyhinə nəsə yazmaq üçün isə kifayət qədər posmodernistlim tələb edir.
Bəs mən nədən söz açmaq istəyirəm.

Çox sadə şeylərdən... Əslində sizin bildiyiniz şeyləri bir az cilalamaq fikirindəyəm.

Uzun müddətdir prezidentlik kürsüsünü zəbt eləməklə yanaşı İlham Əliyev Milli Olimpiya Komiəsininin prezidenti postunu da zəbt edib. Azərbayca nazirlərinin hər biri bir idman növünə rəhbərlik edir: futboldan, damaya qdər bütün idman növləri guya bu nazirlər vasitəsi ilə dövlətin atalıq qayğısı ilə əhatə olunub.
Hökumət bununla da kifayətlənməyib; 30-dan çox rayonda Olimpiya İdman Kompleksləri tikib istifadəyə verib.
İlham Əliyev təşəxxüslə Azərbaycanın idman ölkəsi olduğunu bəyan edir.
Həqiqət necədi bəs?
Həqiqət odur ki, idmana xərclənən (əslində mənimsənilən) milyardlara baxmayaraq olimpiya göstəricilərimiz ölü nöqtənin ətrafından əl çəkə bilmir ki, bilmir. Bunları qoyduq qırağa.
Bəs biz sadə azərbaycanlılar üçün idmanın nə qədər əlçatan olması barədə ürəkdən danışa bilərikmi?
Bu suala cavab verməzdən əvvəl yaşadığınız zonanı saf nəzər edin; baxın görün idman eləmək üçün meydançalar, idman zallar varmı?
Varsa qiymət neçəyədi?
Qiymətin öyrənəndən sonra ordakı şəraiti də yoxlayın və özününüz qərarlaşdırı ki, o qiymət adi büdcə işçisi üçün nə qədər əlverişlidir?
Mənim bu sahədə qənayətim pisdir. Hətta çox pisdir.
Qardaş, sadə idman zallarına getmək üçün gərək ortababa "tərləyəsən".
Çox uzatmayaq. İndi sizə ABŞ nümunəsi verəcəyəm.
Düzü, mən hələ Obamanın ABŞ idmanına qayğı göstərməsi barədə çıxışına rast gəlməmişəm. Heç hansısa amerikalı məmurun da. Fəqət ABŞ-da AzTV-nin sözü ilə desək, idman ictimaiyyətinin bütün istək və arzuları ən yüksək səviyyədə nəzərə alınıb.
Olduğum ən müxtəlif yerlərdə yaşayış binalarının çox yaxınlığında pulsuz (!) futbol, veloybol, qolf və s meydançaların gördüm. Hovuzlar doludur hər yanda...
Bunları kənara qoyaq. ABŞ kapitalist ölkədir, heç olmaz ki burda pullu idman xidməti olmasın. Var təbii.
Bəs onlar necədi?
ABŞ-da idman zalları şəbəkə formasındadı.Yəni siz bir şəbəkəyə üzv yazılırsız və getdiyiniz ixtiyarı şəhərdə, yerdı o şəbəkənin zallarından istifadə edirsiniz.
Mən baş çəkdiyim zal "fitness 24" adlanır. Adından da göründüyü kimi o 24 saat çalışır.
İçərisində ideal şərait var. Uzunçuluq etməyəcək, çəkdiyim fotolar sizə hər şeyi deyəcək. Qiyməti də öyrəndim, bu zaldan birinci ay istifadə üçün 40 dollar verirsən, sonrakı ay isə bu qiymət 29 dolaradək enir.


 Bu məbləğin ABŞ-da nə demək olduğunu bilmək üçün sadəcə, onu nəzərə alın ki burda saatı 8 dollardan aşağı heç kimi işlədə bilməzsiniz, heç kim də işləməz.
Beləliklə, bu qədər uzunçuluqla demək sitəydiyim bu idi ki, bizdə bir çox şeylər kimi idman da birincisi gözdən salınıb, ikincisi dövlət idmana qayğı zad göstərmir, uzaq başı özü üçün beş altı şilləvuranı yetişdirir.