7.12.13

Ələm İlham Əliyev üçün “uçur”!

Internetdə yayılan bir video Sabirabadın ucqar bir kəndini - Moranlını dillər əzbəri etdi. Həmin videoda Aşura mərasimində kənddə bir nəfər ələm “uçurub”, nəzir yığır.

Ələmin “uçması” hökumət mediasında mühüm post tutan hörmətli Qabil Abbasoğlunu, bir çoxları kimi hiddətləndirib. O, bu gerilikçi hadisə ilə bağlı məqalə yazıb, ölkənin önəmli din adamlarına bunun qarşısını almaq üçün çağırış edib.

Məqaləni oxuyub, “facebook” səhifəmdə bunları yazdım: “Moranlıda ”ələmin uçmasına" məqalə həsr edən hörmətli Qabil Abbasoğlunun məqaləsi tam cəfəngiyyatdır. Tam da olmasa, əsasən.

Bəyəm, Qabil bəygilin çalışdığı agentlik - APA, illərdir “ələm uçuranlıq” eləmir?"

Yazdıqlarımı qarşı tərəfin təəssübkeşləri belə yozdular: Natiq, ələm gəzdirməyə haqq qazandırır.

Haşa!

Açıq-aydın yazmamışammı? Ələm gəzdirmək (sabirabadlılar “uçurmaq” yox, belə deyirlər) insanların etibarından sui-istifadədir, ictimai rəyi çaşdırmaqdır, insanları cəhalətə çəkməkdir. APA və ona bənzər hökumətyönlülər də bu işi görmürmü? Görürlər, sadəcə, çox mədəni, çox diplomatik, çox hiyləgərcəsinə.

Siz mənə səmimi deyin: Məzahir Pənahovun seçki qutusundan Ilham Əliyevi çıxarması daha çox fırıldaqdı, yoxsa, ələmin “uçması”?

Məzahirlər bütün xalqın iradəsini zorlayırlar. Nə qədər xoşagəlməz olsa da, ələmin uçmasına heç kim öz iradəsinə zidd tamaşa eləmir, heç nəziri də kiminsə təkidilə ona əta etmir.

Yekunlaşdıraq, ələm gəzdirmək bəraəti olmayan hoqqabazlıqdır, bu, ilk növbədə Kərbəlanın uca şəhidlərinin ruhuna hörmətsizlikdir.

Məni narahat edən odur ki, bir qrup adam var, onlar ölkədə gözəgirən ən ciddi problemlər barədə danışmır, susur. Əvəzində, 40-cı dərəcəli bir problem tapırlar və onu şişirdib, ona qarşı döyüşürlər.

Məsələn, ələm gəzdirməkdən rəncidə olan, bunun, milləti kor etdiyini düşünən Qabil Abbasoğlu bəs niyə çalışdığı holdinqin saxta seçkilərin abra minməsi üçün göstərdiyi fəaliyyətdən danışa, yaza bilmir? Səbəb bəllidir, belə etsə, işini itirər.

Əksini iddia etmək fikrindədilərsə, mən elə Moranlıda müşahidəçilərin çəkdiyi seçki saxtakarlığı barədə özəl, heç yerdə yayımlanmayan videonu APA-ya qonorarsız təqdim edə bilərəm.

Keçək yazarın gətirdiyi dəlillərə. Əlbəttə, ələm gəzdirməklə bağlı onun narahatlığı səmimidirsə, bu alqışlanmalıdır. Ancaq bu problemin meydana çıxmasına onun verdiyi izah çox zərərli və diqqəti yayındırmaqdır.

Necə deyərlər, yaraya acımağı düzdür, yaranın törənmə səbəbini doğru yazmır. Analiz səhvdir.

Məsələn, hörmətli müəllifə görə, ələmə nəzir verənlər zehniyyətsizlərdir. Bu zehniyyətsizlik isə ölkədə korrupsiya doğurur.

Babat bəlağətlidir.

Qabil bəy belə yazsaydı, daha düz olmazdımı: ölkədəki korrupsiyaçı hakimiyyət, bərbad idarəetmə o zehniyyətsizliyi yaradıb.

Çox çətin deyil, internetdə Moranlı kəndinin Ilham Əliyevin dövründə tələbə adı qazananlarının sayına baxın: 10 ildə on adam olsa, papağınızı göyə atın.

Moranlı kəndində ana və uşaq ölümündən Qabil bəyin və dostlarının xəbəri varmı? Axı onları ələmgəzdirənlər öldürməyib...

Birmənalı iddia edirəm, Moranlıdakı vəziyyətin elə olmasına görə cavabdeh birbaşa hakimiyyətdir və o vəziyyətdən də ələmgəzdirəndən daha çox Ilham Əliyev xeyir götürür. Şəkkahlar üçün üç fakt verəcəm.

Bir: 2005-ci ildə Moranlının da daxil olduğu 64 saylı seçki dairəsində “Azadlıq” blokunun namizədi Xaliq Bahadırın səlahiyyətli nümayəndəsi idim. Dairədəki kəndlərdən ikisində seçicilərlə görüş keçirə bilmədik. Həmin kəndlərdən biri məhz Moranlıydı. Bizi kəndin girişində 30-a yaxın adam qarşıladı və dedilər: bizim kəndin namizədi Ilham Əliyevdir, kəndə girsəniz qan töküləcək;

Iki: Son seçkidə Moranlıda Ilham Əliyevə 591 səs yazılıb, Cəmil Həsənliyə isə 28;

Üç: Bu ələmgəzdirənlər Ilham Əliyevə sevgilərini bildirmək üçün mayda ona məktub yazıblar (mənbə president.az).

“Hörmətli cənab Prezident!

Üzümüzü Sizə tutub deyirik: “Allah Sizi bütün çətinliklərdən qorusun. Qadir Allah hər işdə, bütün daxili və xarici siyasətinizdə başınızı uca, ömrünüzü uzun və canınızı sağlam etsin. Allah həmişə və hər yerdə sözünüzü ötkün və bütün işlərdə Sizi fəal etsin. Allah Sizi dünya durduqca yaşatsın. Biz Sabirabad rayon Moranlı kənd sakinləri və ağsaqqalları Sizə nə qədər xoş söz desək, nə qədər tərif versək, yenə azdır”.

Bitmədi, davam edəcək...

(Azadlıq qəzeti, 20 NOYABR 2013 )

Baş (!?) prokururluq və pronoqrafiya

Jurnalist Natiq Ədilova xəbərdarlıq bəzi kütləvi informasiya vasitələrində qeyd edildiyi kimi, tənqidi yazılarına və ya fikirlərinə görə deyil, sosial şəbəkələrdə və KİV-də yaydığı əxlaqa və etika normalarına sığmayan, həmçinin insanların heysiyyatına toxunan yazılarına və şəkillərə görə edilib. Bu barədə “Trend”ə Baş Prokurorluğun mətbuat xidmətinin rəhbəri Eldar Sultanov məlumat verib.
E.Sultanov bildirib ki, qanun pozuntusundan çəkindirmək məqsədi ilə N.Ədilova edilən xəbərdarlıq tam qanun çərçivəsində həyata keçirilib.
“Hamılıqla qanunlara hörmətlə yanaşılmalıdır, o cümlədən Natiq Ədilov da bilməlidir ki, vətəndaşların şərəf və ləyaqətini alçaldan informasiyalar, təhqir xarakterli yazılar, pornoqrafik materiallar çap etdirmək məqsədilə kütləvi informasiya vasitələrindən istifadə olunmasına qanun yol vermir və kütləvi informasiya azadlığından sui-istifadə yolverilməzdir”, - deyə o bildirib.
Xatırladaq ki, "Azadlıq" qəzetinin əməkdaşı Natiq Ədilov Bakı şəhər Baş Polis İdarəsinə çağırılıb və şəhər prokuroru Əziz Seyidovun imzası ilə ona yazılı xəbərdarlıq edilib. Xəbərdarlıq jurnalistin sosial şəbəkələrdə yazdıqları ilə bağlıdır. Xəbərdarlıqda qeyd edilir ki, Natiq Ədilov sosial şəbəkələrdə və kütləvi informasiya vasitələrində "iqtisadi islahatların mahiyyətini və əsl gerçəkliyi əks etdirməyən, əxlaqa və etikaya sığmayan fikirlər" səsləndirib və görüntülər yerləşdirib. Həmin yazı və görüntülərin, eyni zamanda pozuntuların nədən ibarət olduğu açıqlanmayıb.

Baş Prokurorluğun bu xəbərdarlıqla bağlı açıqlamasına Natiq Ədliov münasibət bildirib. O, facebook səhifəsində paylaşdığı cavabda bildirib ki, bu, açıq-aşkar davadır: “Böyük və əzazil dövlət aparatı üstümə hücuma keçib. Baş Prokurorluğun açıqlaması onu hazırlayanların necə cahil və savadsız olduğuna nümunədir. Açıqlamanı oxuyanda özümə sual verdim: Əcaba, burda heç olmaya bir cümlənı başın (beynin) məhsulu saymaq olarmı? Qətiyyən yox.
Bəla da bax burdadır.
Rüstəm İbrahimbəyov hökumətin qəzəbinə gələn ilk müsahibəsində bu problemə toxunmuşdu. O yazmışdı ki, elitanın təbii formalaşma mexanizmi bizim ölkədə yoxa çıxardılıb. Ona görə baş yerinə çox zaman ayağın hökm etdiyi ilə üzləşirsən.
Azərbaycan hakimiyyəti böyük çaşqınlıq içindədir. Bu çaşqınlıq onu hər gün daha ağır səhvlər etməyə vadar edir. Necə deyərələr, bir yalanı ört-basdır etmək üçün yeddisini uydururlar.
Bu baxımdan baş verənləri təmkinlə, gülərək izləyirəm. Mənim şüurlu ömrüm müxalifətdə keçib, tutduğum yolu düz və ədalətli sayıram. Bəşəriyyəti zirvələrə aparacaq yollardan olan bu haqq yolu üçün Natiq Ədilov öz miskin canını çoxdan qurban deyib. Yəni, yoldaşlar, hədə qorxunuzun ən yüksəyi nədir, mustafanı yığışdırın, onu götürün gəlin, mən hazıram.
Azərbaycan hakimiyyəti nəhayət başa düşməlidir ki, ayrı-ayrı etirazçı insanları hədəfə almaq onu rüsvayçı sonluqdan heç cürə qurtara bilməyəcək. Heç bir prokuror, polis, hakim İlham Əliyevin xalqa etdiyi sitəmin unudulmasına məlhəm ola bilməz.
Yazdığımız, danışdığımız sözlər böhtan deyil, həyatın, günümüzün özüdür. Xalqdan aralı düşmüsünüz, qılafınızı sındırın, bir görün çöldə insanlar sizdən nələr danışır.
Problem Natiq, Məmməd, Vəli deyil. Etiraz var, onu yatırmaq istəyirsizsə, səbəbi aradan qaldırın, ədalətli olun, insnanların ləyaqətli həyat sürməsinə imkan verin, qanunları qoruyun”.

4.12.13

Milli Şurada nə baş verir?

Milli Şura artıq xalqın qəlbində özünə yer qazanıb. Hamı bilir ki, hökumət bu alternativ qüvvəni dağıtmaq, heç olmasa zəiflətmək üçün hər şeyi etməyə hazırdır. Yəni indi MŞ-ya qarşı açıq-aşkar getmək, hökuməti sevindirmək bir az qeyri-populyar addımdır. Ona görə də bəzi musavatçı dostlar MŞ ilə konfliktlərini yalnız Rüstəm İbrahimbəyovla, ya da AXCP ilə konflikt kimi təqdim etməyə çalışırlar.
Əslində isə söhbət AXCP və Musavatın arasındakı fikir ayrılığından, hətta konfliktdən də getmir. Musavat bütövlükdə Şurayaa qarşı mövqe qoyur. Rüstəm İbrahimbəyovun fəxri sədrliyini təkcə xalq cəbhəsi dəstəkləməyib ki?
 MŞ-ya yeni sədr seçdiyimiz Cəmil Həsənli, orada çıxış edən ziyalıların demək olar ki, hamısı- Gültəkin Hacıbəyli, Vidadi Mirkamal, Hacıbaba Əzimov, Eldəniz Quliyev, Zəfər Quliyev, Fuad Ağayev, Namizəd Səfərov və başqaları da Rüstəm bəyin fəxri sədr olmasına tərəfdar oldular. Çıxış etməyən ziyalıların da mütləq əksəriyyəti səsvermədə bu təklifə tərəfdar çıxdılar.
El hərəkatı, KXCP və ACP isə nəinki onun fəxri sədrliyinə razı idilər,  hətta onun həmsədr qalmasına israr edirdilər. Demək istəyirəm ki, indiki facebook dövründə xalqı aldatmaq olmaz. Belə görünür ki, İlham Əliyevin dostu Rauf arifoğlu  Musavat partiyasını Milli Şuradan qoparmaq üzrədir. Təəssüf.

29.11.13

Necə oldu ki Əliyevlərin başına havadan pul yağdı?

Razılaşın, pul cəzbedici şeydir.
Milyonlarla insan ona səcdə edir.
Milyonlarla insan onu əldə etmək üçün dəridən qabıqdan çıxır.
Amma yer kürrəsində bir zümrə var ki, onların başına pul sadəcə göydən, havadan yağır.
İnanmırsınızsa təqdim etdiyim bu linkin üstündən vurun, izləyin Əliyevlərin hava maxinasiyası

Qurban Məmmədovla tutdurduğum adamlar


Qurban Məmmədovun üç rəngli bayraqla bağlı vacib bir xatirəsini bilirsinizmi?

Sizə bir böyük sirri açmaq istəyirəm. Bu, hardasa bir “cinayət etirafı” da sayıla bilər. Hüqonun “Səfillər”indəki Jan Valjanın onun əvəzinə başqa birini həbs etmək istəyərkən keçirdiyi daxili təbəllüatlarını xatırlayırsınızmı? Həbsxanadan qaçan Jan Valjan bir gün eşidir ki, onun yerinə başqa bir oxşarını tutub mühakimə edirlər. Həyat bu insanın qarşısına ağır sınaq qoyur; nə etməli, bunu yanlış bir həyat uğuru sayıb susmalı, yoxsa, uca mənsəbini atıb gedib hər şeyi danışmalı?
Vicdan Jan Valjanı ikinci yolu tutmağa vadar edir və o, ağır cəzalanacağını dərk etsə də, günahsız bir nəfərin həbsə düşməsinə imkan vermir. Məhkəməyə gedib hər şeyi danışır.

***

Başa düşürəm ki, edəcəyim müqayisə mənim xeyrimə çox şişirdilmiş olacaq. Ancaq yazacaqlarım da elə belə məsələ deyil. Bilin: bu gün həbsdə günahsız yerə yatan “NIDA”çıların və tanınmış vəkil Qurban Məmmədovun həbs vəsiləsi mən və Qurban Məmmədovun özüdür. Bəli, oxuduqlarınızı səhv qavramadınız: Qurban Məmmədov və mən.
Ancaq “Səfillər”dəki vəziyyətlə fərq ondadır ki, indi yazacağımı sabah gedib məhkəmədə etiraf etsəm, nə məni tutan olacaq, nə də “NIDA”çı gəncləri azad edən.

                                                                  ***


Yanvarın soyuq günləri idi. Işdən evə gec və yorğun gəlmişdim. Təzəcə toxdayırdım ki, Qurban Məmmədovdan zəng gəldi: “Natiq, Xırdalana bir əsgərimizin meyiti gəlib. Uşağı döyüb öldürüblər. Dur get, onu çək. Dərhal get!”
Nə qədər acı olsa da, yazmalıyam. Bu bədbəxt hadisədə xəbər yükü görmədim. Əsgər ölümləri bizim üçün çoxdan adiləşmişdi. Az qala, o vaxt da, elə indi də “daha bir əsgərimiz şəhid öldü” xəbərlərindən “hava sabah yağışlı olacaq” xəbəri qədər həyəcanlana, təsirlənə bilirdik.
Qurban bəyin israrının qarşısında kompramisə belə gəldik: sabah tezdən gedib reportaj edəcəyəm.
Səhər “Azərbaycan saatı”ın operatoru Xalid Qarayevlə deyilən ünvana getdik. Deyilən ünvan bu ilin hadisəsi sayılan əsgər Ceyhun Qubatovgilin həyəti idi. Bəli, o ürək parçalayan foto və videoları orada çəkdik. Işə qayıtdıq, materialı internetə yerləşdirdik. Və bu günə qədər görünməyən oxunma rekordu yarandı - bu gün üçün həmin xəbərin oxunma sayı 330 mindən artıqdı. Ictimai ajiotaj yarandı və sonrası bəllidir.
Gəncliyin ardıcıl dinc aksiyaları başladı, qalxınmadan narahat olan hökumət fəalların bir qismini şərləyib həbsə atdı.
Qətiyyən belə rəy yaranmasın ki, Qubatovun ölümü ilə başlayan aksiyalar olmasaydı, həbslər baş verməyəcəkdi. Xeyr, gec-tez bu olacaqdı. Amma təkrar edirəm, Qurban bəylə bizim iş vəsilə oldu.
Bu baxımdan mən “NIDA”çı dostlarla Qurban Məmmədovun həbsində üzvü bağlılıq, vəhdət görürəm.
Bu, mənim etirafım idi. Indi söz səndədir, yoldaş hakim!

***

Etiraf bitdi, indi isə keçək ondan da az əhəmiyyətli olmayan faktlara. Bilirsiniz ki, Qurban Məmmədov gülünc bir ittihamla şərlənərək, zindana atılıb. Bu, onun üçüncü siyasi məhbus həyatıdır. Qurban Məmmədov ilk dəfə Sovet Azərbaycanında, sonra Heydər Əliyevin zamanında, bir də indi tutulub.
Son məhkəmə zamanı bəlkə də çoxlarınızın şablon saydığınız bir fikir işlətdi Qurban bəy: “Mən vaxtilə Azərbaycan bayrağını ilk dəfə dalğalandırmağıma görə ittiham olunanda indi filan-filan yerlərdə olanlar həmin vaxt məni dalğalandırdığım bayrağın altında yalan ifadələrlə, qurama istintaqla şərləyərək ittiham edirdilər”.
Qurban Məmmədovun dedikləri nə qədər obrazlı ifadə olsa da, eyni zamanda da faktolojidir, hərfi baxımdan doğrudur. Sizə təqdim edəcəyim faktlar ilk dəfə mətbuata yol tapır. Onları bir-bir incələyin və qərar verin: bu ölkədə Bayraq Günü elan edənlərin, ən uca bayraq dirəyi ucaldanların əməyi, qəhrəmanlığı, üç rəngli qumaşa aidiyyatı daha çoxdu, yoxsa Qurban bəyin?!
Bələdçimiz həmin vaxtda aparılan istintaq materiallarıdır - məhkəmə hökmü və ittihamnamə:
“Istintaq orqanı müttəhim Qurban Məmmədovu yuxarıdakı maddələrlə müqəssirliyə ona görə cəlb etmişdir ki, o, AXC Ali Məclisinin üzvü, AXC Sabirabad şöbəsinin əlaqələndiricisi olaraq, tabeliyində olan dəstənin üzvləri ilə 1989-cu ilin sentyabr-dekabr və 1990-cı ilin yanvarının ayrı-ayrı günlərində Sabirabad şəhərinin Lenin meydanında ictimai qaydanı kobud surətdə pozaraq, idarə, müəssisə və təşkilatların işinə mane olan mitinq keçirilməsini təşkil etmiş, həmçinin bu mitinqlərdə fəal iştirak etmişdir.
25 noyabr 1989-ci ildə qanunsuz keçirdiyi mitinqdə Sabirabad rayon Xalq Deputatları Sovetinin binası üzərindəki  Azərbaycan SSRI-nin bayrağı barədə təhqiredici hərəkətlər etməyə başçılıq etmişdir..."
Şahid ifadələrindən: “Qurban Məmmədov çıxışında XDS binası üzərindəki bayrağı göstərərək dedi ki, bu bayraq bizim bayraq deyil. Bu, xalqın qanı ilə yoğrulmuş bayraqdır. Bu, faşist bayrağıdır. Bu bayraq bizə lazım deyil, çıxarın onu atın, yerinə AXC bayrağını, bizim bayrağı asın. Bu vaxt orada olanların əlində üç rəngli bayraq vardı.
...Onlar Azərbaycan SSRI-nin bayrağını çıxarıb yerə tulladı, yerinə üçrəngli bayrağı asdılar. Azərbaycan bayrağı yerə düşəndən sonra Qurban Məmmədovla gələn azğınlaşmış adamlar onu cıraraq tapdaladılar".
Sabirabad rayon prokurorluğunun AXC Idarə Heyətinin sədri Əbülfəz Elçibəyə məktubundan: “...Sabirabad şəhər mərkəzində Qurban Məmmədovun təşəbbüsü ilə partiya biletləri yığılmış, Azərbaycan KP MK-nin binasına çoxyüzlü yürüş təşkil edilmiş, yürüşdə məqsəd birinci katibin istefasını tələb etmək olmuş, nəhayət buna nail olmuşlar.
Bundan sonra Qurban Məmmədov mitinqlərdən birində partiya biletini yandırmaqla, digərlərini də buna sövq etmiş, ona baxıb partiya biletlərini cıranlar da olmuşdu".

Bunlar hələ qurbannamədən kiçik hissələr idi. Ancaq təkcə bu detal, kimin kim olduğunu müəyyən etməyə kifayət edir.

25.11.13

Heydər Əliyev fondu barədə heç yerdə eşitmədiyiniz söhbətlər

Azərbaycanda danışılması, yazılması həyat bahasına başa gələn bir mövzu var: Heydər Əliyev Fondu!
Dövlət siyasəti nəticəsində az qala sirrlər xəzinəsinə çevrilən bu təşkilat həm də qorxuncdu.
Adamlar fond haqqında pis fikirləşməyi belə həyatları üçün risk bilirlər.
Belə bir şəraitdə xalq fondun əsl mahiyyətindən təbii olaraq xəbərsiz qalır.
Qənimət Zahid hazırladığı qısa bir video ilə isə H.Ə. Fondu üzərindəki qara pərdəni qaldırıb.
Gəlin, baxaq o nəmənədir.
Bu video üçün hörmətli Qənimət bəyə ayrıca təşəkkür düşür.
Fransa hökumətinin yerinə olsam elə tək bu reporaja görə Qənimət Zahidə cəngavərlik ordenin verərdim :)
VİDEONU İZLƏMƏK ÜÇÜN BU YAZININ ÜZƏRİNƏ VUR

Dəmirsizlik

Dəyərli xanımlar və bəylər, əziz yoldaşlar!
Uca səslə etiraf etməsək də, ürəyimiz ağıryaraq müşahidə edirik ki bu dilbər yurdumuzda günü-gündən özünü apara bilməyən, birgəyaşayış qaydalarını mənimsəməyən adamlarımız günü gündən artır.
Bunun bir səbəbi bizə aydındır: hakim ictimai-siyasi əclafdır, təbliğ olunan və ya üzdə olan siyasət adamlarımızı formalaşdırmır, əksinə olub qalanın da əlindən alır. Bu isə sonda axmaqlığın və bu kimi hərəkətlərin sayın artırır.
Lakin, mən BMT-nin Əhali Fondunun Azərbaycanda qidalanma ilə bağlı bir hesabatın oxuyanda daha bir səbəb tapdım və barmağımı dişlədim.

Ana və uşaqların qidalanması UNICEF tərəfindən ölkə əhalisinin rifahını daha da yaxşılaşdırmaqla önəmli dəyişikliklərin həyata keçirildiyi digər önəmli sahədır. Uzun dövr ərzində anemiya bir çox qadınların və onların yeni doğulmuş körpələrinin məruz qaldığı xəstəlik olmuşdur.

"Mütəxəssislər müəyyən edilmişdir ki, hər üç reproduktiv yaşda olan Azərbaycan qadınından ikisi anemiyadan əziyyət çəkir. Səhiyyə peşəkarları bu vəziyyəti “acınacaqlı” kimi təsvir edir. Bəzi yerli səhiyyə işçiləri bu vəziyyətə o qədər öyrəşiblər ki, hamilə qadın anemiyadan əziyyət çəkmədikdə, bu onları təəccübləndirir.
Bir çox hallarda səhiyyə işçiləri bu vəziyyətin ciddiliyini və bu vəziyyətin ananın həyatına təhlükə törətdiyini və uşağın əqli inkişafına mənfi təsir göstərə biləcəyini lazımınca dərk etmirlər".


Hər şey başa düşülən oldumu? Dəmir defisiti kəmağıllıq yaradırmış.

12.11.13

İnsanın çəyirtkəyə dönməsi

Bizim avtobusda elə oturacaqlar var ki, orda əylaşmək üçün gərək çəyirtkə olasan. 
***
Orda oturanda adamın qıçı çənəsinə qədər qalxır.

(13 dekabr 2010, facebook qeydlərimdən)

Cin Nərimanov rayonunda

Zəng eləmişdim Nərimanov rayon icra hakimiyyətinə. 
Bir xanım götürdü, guya soruşmalıydı ki, sizdə tüstü bacaların təmizlənməsi işinə kim baxır, belə soruşdum: Xanım, icra hakimiyyətində damdabacalarla kim məşğul olur :)
Xanım, çaşdı, təəccüblə dedi ki biz elə işlərlə məşul olmuruq, bu şayiəni kimdən eşitmisiniz?
PS. Dambabaca- polterqeyst, səs-küy salan ruh-filan
(14 dekabr 2011, facebook qeydlərimdən)

5.11.13

Qurban Məmmədov İsa Məsih rolunda

Gurban Mammadovun mehkemesinden qovlandım. Mence hakim edaletsizlik etdi, bunu özüne de dedim.
Hadise bele oldu.
Qurban beye qarşı iddia qaldıran şexs zala esa ile gelmişdi.
Mehkemede onun sehvlerini Qurban bey o qeder tutdu ki, adam bir anda çıldırdı, qabaqda vekiller üçün nezerde tutulan stola teref cumdu ( esasız ve tam normal addımlamaqla) ellerini stola çırpıb dedi: men azerbaycan dilinde bu p.xu elli defe izah etdim :)
Buna nede gülmemek olardı. Güldüm. Hakim dedi, çıx çöle.
Dedim, ağsaqqal, özünü gülünc aparma, məhkəməni p.xa dönderene dinmirsen, amma gülüşü cezalandırırsan.

26.10.13

Bizə kömək et

Bu gün mən çox qəzəbliyəm.
Qəzəbim fərdi problemlərimlə bağlıdır.
Bu gün yenə maaşımı ala bilmədim, belə getsə onu alacağıma ümidlər də çox azdır. Onsuz da bir dərdə dərman olmayan bu az maaş hansısa bazar arvadına ( qəsdən belə acı yazıram) görə verilmir.
Bəli, vəziyyəti az-çox siz də bilirsiniz, “Azadlıq” qəzetinin hesabına həbs qoyulub. “Binə” bazarının bazarkomu Kəbirə qəzeti 32 min manat cərmələdib deyə. Gələn pullar ona gedir.
Dərd tək bu deyil ki...
“Azadlıq” qəzeti bir o qədər pulu da dişi-dırnağı ilə qazanıb hər ay metro Tağıya ödəyir.
Amma o zəhləmgetmiş reklamda deyildiyi kimi, bu da son deyil: qəzeti satan dövlət şirkəti bizə borcu olan 50 min manatı da ödəmir.
Bu azmış kimi “Metroyayım” şirkəti hər gün satdığı 1500 nüxsədən imtia edib.
Vəziyyət belə faciəlidir.
Qasim bəy Zakir nə gözəl demişdi
“Vilayəti viran eylədi yaxşi,
Bir qafili-piyan, bir mayili-kart”.
Biz qumarbaz və əyyaşların kaprizlərinə qurban olmuşuq.
Bir bazar arvadına ölkədə “Azadlıq” qurban verilir, lənət olsun!
Yaxşı indi, siz ey böyük ölkənin  şanlı insanları, nə fikirdəsiz?
Bu bazar arvadlarına təslim olaq ya yox?
Mən hayasızlığıma salıb sizdən soruşmaq istəyirəm: siz öküz döyüşünə zada baxmırsız ki? “Azadlıq” qəzeti bu vəhşi hökumətlə ən qansız riskləri boynuna götürərək dava aparır, nolar siz də bir kömək edin də.
Nə edə bilərsiz? Çox şey.
Məsələn,  qəzetin aylıq abunəsi 12 manatdır, ona yazıla bilməzsiniz? Çox rahat bilərsiniz. Sadəcə istəmirsiniz.
Mən sizdən kömək umuram. Bunu açıq və utanmadan deyirəm.
Bizi bazar arvadlarının ayağına verməyin.
Siz deyəcəksiniz, bezdik, daha nə qədər imdad olar. Bəli, haqlısız, “Azadlıq” az qala hər ay belə problemlə üzbəüzdü. Ancaq, neynəyək bizi düz danışdığımıza görə cəzalandırırlar.
İki yol var: yalançıları səlahiyyətdən məhrum etməliyik, ya da özümüz susmalıyıq.






16.10.13

Siyavuş Novruzov dəli olub

İstənilən adamla mübahisəyə hazıram: Siyavuş Novruzov dəli olub, o idrakdan məhrumdu.
Müsahibəsinin hələ bir abzasın oxumuşam, adam kəllə- mayallaqdı.
Birinci cümlədə deyir ki, ATƏT-nin İlhama oğru, saxtakar deyən təsisatı DTİHB ABŞ-ın sözü ilə oturub durur.
İki cümlədən sonra isə deyir ki, DTİHB qyeri-ciddi təşkilatdı, onların hörməti, mötəbərliyi yoxdur, heç ABŞ öz seçkilərinə onları buraxmayıb.
Birincisi: DTİHB qeyri ciddi təşkilat olsaydı Mehdiyev daxil olmaqla hakimiyyətdəkilər bu cürə isterikaya düşməzdi.
İkincisi: DTİHB -i ABŞ-a bağlamaqla Siyavuş özlərini lap pis duruma salır. Azərbaycab camaatı ayıqdı, bir az da yıxılana balta çalandı.
Xalqımız siyavuşun sözlərini Allah edə ciddiyə ala. Onda hamı biləcək ki, biz heç bunların üstünə ABŞ gəlir, bu isə oğruların sonudur.

15.10.13

Heydər Əliyevin ayaqları altında ölmək istəyən adam

Bu gün Qurban bayramıdır.
Düşündüm, dostlarımı, oxucularımı bu gün necə şad edə bilərəm.
Əlbəttə, könül istərdi, bir cöngə kəsil dostlara paylasın, ancaq bilirsiz, buna gücüm çatmaz.
Qələm adamınınkı yazıdır, mən onu sizə hədiyyə edirəm. Bu yazı Heydər Əliyevlə Çoban Xanışın dialoqudur. Keçən əsrdə yetkinlik yaşına çatanlar bu çıxışı dinləyib, təbrizlilər demiş, betər keyf aparıblar. İndi siz də oxuyun kefinin kökəlsin.
Yazıda ən diqqət ediləcək yer, qırmızı ilə işarə etdiyim yerdən aşağıda baş verənlərdi.
Heydər Əliyevə "Sizin kimi kişinin ayağı altında ölüm", sizi görməklə elə bil ki, gedib Kərbəlanı ziyarət edirəm" mədhiyyəsin söyləyən Xanış bircə kəlmə deyir ki, camaatın dolanışıqda bəzi çətinliyi var!
NƏƏƏƏ! Çətilik! 
Heydər Əliyev onun üzərində hücum çəkir. Və Xanışı çox incə yerindən vurur. Bilir ki, Xanış qanunsuz olaraq rayon islahat komissiyasına sədrlik edir və başlayır ordan onu vurmağa. Oxuyaq :)
Heydər Əliyevin Qurban Bayramı günü Lerikli fermer Xanış Şahıyevlə görüşdə çıxışı
 18 aprel 1997-ci il

Heydər Əliyev: Səni və Lerik camaatını Qurban bayramı münasibətilə təbrik edirəm. Qurban bayramı xalqımızın, millətimizin milli, dini bayramıdır, əziz bayramımızdır. Bu gün bütün xalqımız bayram edir. Bir zəhmət adamı, əsl
Azərbaycan vətəndaşı kimi bu bayramı həm öz evində qeyd etmisən, həm də qurban kəsib gətirmisən ki, onu səninlə birlikdə paylayaq, camaatın bu bayramı yaxşı keçirməsinə kömək edək. Çox sağ ol, təşəkkür edirəm.
Səninlə artıq birinci dəfə deyil ki, görüşürük. Sən mənim dostumsan, mən də sənin dostunam. 
Mən həmişə dostluğa sədaqətli olmuşam. Həmişə arzu etmişəm ki, mənimlə dostluq edən adamlar sədaqətli olsunlar. Düzdür, həyatımda sədaqətsizliyə də rast gəlmişəm. Ancaq bu böyük, uzunmüddətli həyatımda mən xalqın sədaqətini həmişə hiss etmişəm və ona yüksək qiymət vermişəm. Bu ağır dövrlərdə məni yaşadan, bütün bu çətinliklərin öhdəsindən gəlməyimə imkan verən xalqın sədaqəti, xalqın zəhmətimə verdiyi qiymət olubdur. Mənim ən böyük dayağım xalqdır.
Xalqın da ən görkəmli nümayəndələrindən biri sənsən.
Lerik Azərbaycanın dağ, ucqar rayonudur. İndi sən dedin ki, Lerikdə 64 min əhali yaşayır. Orada gözəl insanlar, zəhmətkeş adamlar, qəhrəman insanlar yaşayır. Bu qəhrəmanlardan biri də sənsən və doğrudan da nümunəsən. Həm əməkdə, həm həyatda, həm də Vətənə sədaqətində qəhrəmansan. Oğlun şəhid olubdur, övladların ölkəmizə sədaqətlə xidmət edirlər. Məni sevindirən odur ki, indi sən bildirdin, iki oğlunu orduya xidmətə göndərmisən. Gördüyün işlər, zəhmətin, qazandığın hörmət ailənlə birlikdə sənin xalqa, millətimizə göstərdiyin böyük xidməti sübut edir. Ona görə də mən sənə təşəkkür edirəm. Xahiş edirəm, mənim salamımı, bayram təbriklərimi bütün Lerik camaatına çatdırasınız. Mən leriklilərlə əbədi dostam. Bu dostluq çox böyük sınaqlardan keçibdir. Bu dostluğun ən gözəl nümunəsi isə mənim səninlə dostluğumdur. Bu gün sən gözəl sözlər danışdın. 
Bilirsiniz, mən keçən dəfə də demişəm, alimlərimiz, yazıçılarımız, şairlərimiz, mədəniyyət xadimlərimiz hesab edirlər ki, dəyərli sözləri onlar deyə bilərlər. Ancaq xalqımızın çoxəsrlik tarixində dəyərli, müdrik sözləri müdrik insanlar deyiblər. Müdriklik təkcə o insanların elmi biliyi, təhsili ilə bağlı deyildir. Müdriklik insanın fıtri istedadıdır, müdriklik həm də insanın həyatı dərk etməsi, gedən proseslərə düzgün qiymət verə bilməsi və ondan özü üçün lazımi faydalar götürməsidir. Sən dağda yaşayan, təsərrüfatla, heyvandarlıqla məşğul olan bir şəxssən. Azərbaycanın xarici siyasəti haqqında nə gözəl, ağıllı, dəyərli sözlər deyirsən. Lissabon Zirvə görüşündə dünyanın 54 dövlətinin başçılarının toplandığı mötəbər beynəlxalq tədbirdə Azərbaycan Respublikasının siyasətinin əldə etdiyi nailiyyəti, qələbəni tamamilə doğru, düzgün qiymətləndirirsən, bu qələbəyə sən qurban kəsmisən.
Xanış Şahıyev: Cənab prezident, bayaq da dedim, mən Sizin keçirdiyiniz bütün tədbirlərə, səfərlərinizə televiziya vasitəsilə çox böyük maraqla tamaşa edirəm. Bu gün mən buraya 155- dən çox qurban kəsib gətirmişəm. Mənim üçün Sizinlə dostluq etməkdən böyük xoşbəxtlik yoxdur. Siz mənim gözəl prezidentimsiniz. Bu, gözəl arvadımdır, bu da mənim nəvəmdir. Kişi gərək kişinin ayağı altında ölsün, namərdin yox. Mən Allahdan həmişə arzu edirəm ki, Sizin kimi kişinin ayağı altında ölüm. Bu, mənim üçün bəsdir. Elə bil ki, gedib Kərbəlanı ziyarət edirəm. Lissabonda dünyanın bütün ölkələrinin başçıları Sizin sözünüzü eşitdi. Siz bu qələbəni əldə etdiniz. Qoy xalq da bilsin ki, əgər Siz hər hansı bir işdə mənə kömək etsəniz, mən dostluğu pozaram. Bu mənə bəsdir ki, mən Heydər Əliyev kimi böyük bir şəxsiyyətlə dostluq edirəm. Mən tamahkar adam deyiləm. Adam var ki, vəzifə dostudur, adam var, ehtiyac dostudur. Amma mən ürək dostuyam, bir gün də məktəbə getməmişəm.
Heydər Əliyev: Sən vəzifəli adam deyilsən. Amma nə qədər böyük məktəblər qurtarandan da çox ağıllı sözlər danışırsan.
Xanış Şahıyev: Mən uşaq deyiləm ki, prezidentin dostuyam.
Heydər Əliyev: Prezidentin dostu olmaqla yanaşı sənin əməllərin, həyatın var.
Xanış Şahıyev: Mən boş-boş danışan adamları sülhə, prezidentin ətrafında birləşməyə çağırıram. Cənab prezident, rayonumuzda işlər çox yaxşı gedir. Əkin də yaxşı gedir. İndi yaylaqdan Lerikə yeni su kəməri çəkilir. Bu su yayda gəlib Lerikə çatacaqdır. Yaxşı işə Siz də, biz də qiymət veririk.
Heydər Əliyev: Müdriklik insanın kökündə, əməllərindədir. Mən də səni öz dostum, müdrik bir adam kimi qəbul edirəm. Müdrik, ağıllı adamsan. Sənin bu təşəbbüsün Azərbaycanda bütün zəhmət adamları, saf, pak insanlar üçün böyük nümunədir. Çox sağ ol. Təşəkkür edirəm. Sən bu qədər qoyun kəsib gətirirsən. Lerikdə camaat yaxşı yaşayır, yoxsa yox?
Xanış Şahıyev: Mən prezidentə yalan danışa bilmərəm, çətinlik var. Amma Allahın köməyi ilə ötən il payız Lerikdə çox yaxşı keçdi. Camaat necə lazımdır, elə də əkib. Allahın köməyi ilə gələn il leriklilər taxıl satacaqlar.
Heydər Əliyev: Mən Lerikdə gedən islahat haqqında soruşmaq istəyirəm.
Xanış Şahıyev: Mənə elə gəlir ki, heç bir rayonda Lerikdəki kimi islahat getmir. Lerikdə malqara, qoyun nəzarət altında camaata verildi. Rayonda islahatlar çox yaxşı gedir.
Heydər Əliyev: Biz islahatların gedişi vəziyyəti haqqında müşavirə keçirdik. Sən ona qulaq asdm?
Xanış Şahıyev: Sizin tədbiriniz olanda mən işimi-gücümü atıb həmin gün televizorun qarşısında oturub bunlara qulaq asıram.
Heydər Əliyev: Sən müşavirədə gedən müzakirələri bəyəndinmi? Demək istəyirəm ki,islahatlarla əlaqədar görülən işlər doğru-düzgün işlərdimi?
Xanış Şahıyev: Bəli, bunlar çox düzgün işlərdir. Xalq bütün bünları çox yaxşı qarşılayır. Fəhlə onsuz da fəhlədir, qoy o boş-boş danışanlar da işə qoşulsunlar.
Heydər Əliyev: Biz istəyirik ki, camaatın malı, mülkü olsun, adamlar sahibkar olsunlar, hərə öz mülkünün sahibi olsun.
Xanış Şahıyev: Bunlar mənim ata-babamdan qalma malımdır. Əgər təsərrüfatım yaxşı olmasaydı, bunları bura gətirə bilməzdim. Gərək camaat da çalışsın, işləsin, öz xüsusi malına, əkininə yaxşı baxsın.
Heydər Əliyev: Lerikdə torpaq camaata paylanıbdırmı? Camaat bundan razıdırmı?
Xanış Şahıyev: Bəli, paylanıb, camaat da bundan çox razıdır. Ağsaqqal olduğuma görə məni islahat komissiyasının sədri təyin ediblər. Hər iş razılıqla görülür, hamı bu təşəbbüsü bəyənir.
Heydər Əliyev: Çox sağ ol. Mən sənə təşəkkür edirəm, səni təbrik edirəm. Çox yaxşı ki, bu dəfə xanımını da gətirmisən. De görüm, bu sənə neçə övlad bəxş edibdir?

Xanış Şahıyev: 17 uşaq anasıdır. Onların 16-sı oğlandır. Bu uşaqlardan ikisi şəhid olubdur. Hörmətli prezident! Mənim ailə üzvlərim ilə mehribanlıqla görüşdüyünüzə görə Sizə bir daha öz dərin minnətdarlığımı bildirirəm.

13.10.13

Zəhərlənməmisiz ki?


Katalizator. Bu söz zənnimcə, çoxlarına aydındı.
Katalizator, kimyada reaksiyanın sürətini artıran, ancaq özləri reaksiyada istifadə olunmayan maddələrə deyilir. 

Katalizator reaksiyanın başlanğıcında necədirsə, sonunda da elə olur: çəkisi, rəngi, xasssəsi dəyişmir.
 İngibitor. Bu söz isə yəqin, çoxlarına  aydın deyil.
İngibitor, kimyada reaksiyanın sürətini azaldan, ancaq özləri reaksiyada istifadə olunmayan maddələrə deyilir.
 İngibitorun reaksiyanın başlanğıcında necədirsə, sonunda da elə olur: çəkisi, rəngi, xasssəsi dəyişmir.
İngibitorlar həm də katalitik zəhər adlanır.
İngibitor katalizatorun əksidir.
Bizim aramıza xeyli ingibitor soxulub.
Onları guya “mübariz”dilər. Ancaq əsas missiyaları mübarizə aparan insanları zəhərləmək, ümidsizlik qığılcımı olmaqdı.
Belələrinin ən böyük silahlarından bir neçəsi “onsuz da xeyri yoxdur”, “əşşi gördük də”dir.
"Tövrat"da Süleyman peyğəmbər sərkərdələrinə tövsiyyə edirdi:" Döyüşə gedəndə ürəksizləri qoyun qalsın evlərində. Çünki cəsurluq kimi qorxaqlıq da sirayət edicidir".
Sözüm budur: Zəhərlənmədən qorunaq.
Var ümid gələcəyə!

Mirşahin və Cəlal Əliyev+ Vüsal Qasımlı

Cəlal Əliyev
 Hamımız Mirşahinə əsəbləşmişik, yenə. Haqsız da deyilik.
Mirşahin müəllim hər dəfə ANS-də iftira deyəndə akademik Cəlal Əliyevin onun haqqında fikirləri yada düşür.
Mənə elə gəlir ki, hər dəfə o məşhur çıxış yayılanda, ictimailəşəndə ən çox od tutub yanan Mirşahin müəllim yox, akademik Əliyev olur.
Niyə? Əlsa ona görə yox ki, ağsaqqal yaşında latayır söyləyib. Yox, yox, bu deyil.
Sizə bir sirr açım: Sizin yadınızdadı Cəlal müəllim onda niyə sinirlənmişdi? 

Vüsal Qasımlı
ANS-in "Hesabat" jurnalinda gedən "ən varlı azərbaycanlılar" məqaləsinə (Məqalə barəqə qısa qeydi burdan oxu) görə. O yazının müəllifi isə iqtisadçı və bir zamanların alovlu müsavatçısı Vüsal Qasımlıydı.
Vüsal Qasımlı indi İlham Əliyevin yanında yaradılan Strateji Araşdırmalar Mərkəzində yüksək post tutur.
Təsəvvür edirsiz?
Deyilənə görə Cəlal müəllimi Prezident Aparatına buraxmırlar, Vüsal Qasımlı isə orda strateji işlər görür. Özünüzü qoyun Cəlal müəllimin yerinə, siz hafizhacıyev demişkən, od tutub yanmazsız?
"7 oğul istərəm" filmində Cəlal hakim zümrənin qızına görə dostlarının tənəsini yeyir.
Bizim çağdaş Azərbaycanda tarix, bir az kobudluqla da olsa təkrarlandı. 
Siyasi kluarlarda belə söhbət var ki, Cəlal əminin vurulmasına səbəb İlham Əliyevin həyat yoldaşıdır.
Hətta belə bir şəhər əfsanəsi də var.
Cəlal Əliyev gəlir Prezident Aparatına və ordakılara deyir: İlham Paşayevə deyin, Cəlal Əliyev gəlib!

12.10.13

Oğru işin gördü, növbə doğrunundu!

Hamınız gördük: 9 oktyabrda İlham bizim haqqımızı oğurladı, əslində ölkədə dövlət çevirilişi baş verdi.
Şükürlər olsun, bu dəfə deyəsən, beynəlxalq təşkilatlar qara kürüyə uymayıb. ATƏT , ABŞ Dövlət Departamenti, İngiltərə hökuməti seçkilərin saxta olduğun deyir.
 Bəs sonra nə olacaq?
Proqnoz vermək indi asandır:  12 oktyabrda keçirilən saxtaklarlığa etiraz mitinqi və ümumiyyətlə oğruluğa qarşı kütləvi qəzəb sistemli xarakter alsa və yüksəlsə şər rejimi rahatlıqla cəhənnəmə vasil olur.
Günün bir nömrəli iş psixoloji üstünlüyü qoruyub saxlamaq, təşkilatlanmaq və dinc etirazları davamlı etməkdir.
Bunları edə bilməsək küsməyə, talemizdən üz döndərməyə, beynəlxalq təşkilatlardan inciməyə dəyməz.
Niyəsin başıma gələn hadisə ilə izah edəcəm.
Türməyə təzə düşdüyüm günlər idi. Hələ polisdə saxlanırdım. Yanıma bir cavan yeniyetmə gətirdiler. O tutularkən polisin başına getirdiklərin danışırdı, saçların biz-biz dururdu.
Məsələn, deyirdi onu it kimi döyüblər, bu öz yerində, sonra ise ana-bacısın ağır söyüblər, daha sonra deyiblər ki o söyüşdə ifadə etdiklərin əzizlərini gətirib gözünün önündə edəcəklər.
... Mən xeyli əsəbiləşdim. Adama dedim, sənə görə nə lazımdı etməyə hazıram, öz işimi lap unuduram. Başladım onun haqda DİN, MTN, beynəlxalq təşkilatlara, qəzetlərə şikayət yazmağa.
 Yazdım bitirdim sonra dedim di gəl imzala.
Yeniyetmə duruxdu və imtina etdi. İndi daha betər əsəbiləşdim. Ona imza atmağı üçün bütün səyləri divara dəydi.
Bütün bunlardan sonra dedim, igid, sənə deyəsən axı hələ az söyübler, sən o təhqirlərin hamısını qəbul etməyə hazırmışsan ki...
Bunları yazmaqda məqsədim odur ki, çox beynəlxalq təşkilatların bizə ürəyi yana bilər, burda dəyişiklik olmasın istəyərlər, fəqət biz əliyevlərin zülmünü, haqsızlığını həzm edəcəyiksə onda heç.
Ümidvaram ki, zülmdən, haqsızlıqdan pəhriz saxlamağı qəbul edənlərin sayı indi daha çoxdur və artmaqdadır.

10.10.13

İlham Əliyevin qələbədən çox istədiyi şey haqda

Fotodakı çiçəyi görürsünüz?
Şübhəsiz həyatda belə hadisəyə rastlaşmısınız.
Zərif bir bitki qalın bir örtüyü deşib boya ata bilir.
Burda hikmət odur ki, bütün bitkilərdə günəşə tərəf can atma var.Yalımıransa botanikada müsbət polyarlıq deyirdilər.
Azərbaycanda da hazırda belədir; hesab edin, ölkədə "günəşə axın-axın yürüş edən" bir  zümrənin üstündən İlham Əliyev asfalt çəkdi.
Bu müvəqqəti haldır.
Heç kim bizim ürəyimizdəki o günəşə canatmanı ləğv edə bilməz. Bu insan fitrətidir, heç kimin poza bilməyəcəyi bir fitrət!
Odur ki, əmin olun. Əliyevlərin simasında urcah olduğumuz bu zülm, zillət tezliklə ölkəmizdən rədd olub gedəcək. Asfaltları körpə amma günəşə qovuşmaqda israrlı olan fidanlar dağıdacaq.
O günə az qalıb.
Düşmənin ən böyük istəyi, bizə qalib gəlməkdən daha çox bizi mənəvi olaraq sındırmaq, asfaltı çiçəklərin deşmək gücündə olmamasına inandırmaqdı. İnanmayaq.

29.9.13

Balıq hafiz gülməlidir, ya biz?

Bir neçə il əvvəl idi. 
AXCP-də  hesabat xarakteli iclas keçirirdik. Əli Kərimli (partiya sədri) hamını dinlədi, vəziyyət yaxşı deyildi, hesabatların məzmunundan görünürdükü mən daxil çoxu öz vəzifəsinə etinasız yanaşıb, vəzifə borcunu gərəyincə yerinə yeriməyib.
O zaman Əli Kərimli ömrü boyu unutmaycağım və hər kəs üçün ibrətlik fikir dedi.
Təxminən belə: “mən heyrət edirəm, siz o sıravi JEK işçilərin görmüsünüz,  onlar 5-10 manat maaş alırlar, ancaq seçki saxtakarlığı üçün qarışqa kimi çalışırlar. Bütün qüvvələrini bu işə qoyurlar.
Mən soruşuram: niyə bizdə o JEK işçısındə olan qədər öz işinə bağlılıq, can yandırma yoxdur?
Şamil Vəliyev
Niyə o JEK işçısı nahaq işin qalib gəlməsi üçün can qoyur, amma biz haqq işimiz üçün iki addım atıb yoruluruq, bir həftə yatırıq?
Bu suallar indi, seçki kampaniyasının bu gərgin anlarında xüsusən aktualdır. Siz hafiz hacıyevin mitinqini gördünüz. Pis demək olmaz. Babat idi. Əlbəttə, ora yığışanlar hafizlik deyil, İlham Əliyevlikdir. 
Ağa deyib, davay dərəyə, onlar da sürüblər ora.
Mən jurnalist Sevinc Vaqifqızını qeydlərindən oxuyanda ki, BDU-nun jurnalistika fakültəsinin dekanı Şamil Vəliyevi tələbələri başına yığıb Hafizin  mitinqə gətib, yerə çökdüm, başım hələ də ağırıyır.
Bu alçaq mənzərənin, Azərbaycan insanın qürurdan məhrum edilməsinin baiskarı hazırkı hakimiyyətdir və mən buna görə əliyevləri şiddətlə lənətləyirəm. Fəqət o lənətdən daha artıqın özüm, dostlarım, əqidədaşlarım üçün edirəm.
Axı niyə biz “onlar” qədər işimizə bağlı deyilik?
 Necə olur ki, universitetdə vəzifəsi olan bir müəllim hətta özünə rəva bilir ki meydana gəlib Hafiz Hacıyevi dinləsin, ancaq biz Cəmil Həsənli kimi cəsarətli və ləyaqətli adamın mitinqindən yayınmaq üçün min bir yol tapırıq, yolu tapmayan da da qarnımız ağırıyır.
Xüsalə, söz budur: şər cəbhəsi qədər öz dəyərlərimiz uğrunda fədakar və inadcıl olmasan bizi əbədiyyən İlham- Haciz tandemindən çox bəlalar dadmalı olacağıq.

Seymur Baycan və KQB agentləri

Seymur Baycan
Keçən il "Eurovison" vaxtı müxalifət pis-yaxşı meydana çıxıb, ard-arda aksiyalarla hakimiyyəti dalana dirəmişdi. (Əli Həsənovun fikirlərini yada sal:" müxalifət yüz ildə edilməyən pisliyi Azərbaycan dövlətinə (əslində hakimiyyətinə) etdi").
Belə bir pərt vəziyyətdə hakimiyyət növbəti əxlaqsızlığa əl atdı, Əli Kərimli polisdə "qarışıqlıq yaradır" bəhanəsi ilə istintaqa cəlb edildi;
 onun evinin qarşısında elə hakimiyyətdəkilərin ailə tərbiyəsinə uyğun mənəvi şikəstlər mitinq keçirməyə başladı.
Belə bir anda bizim sevimli yazarımız Seymur Baycan beqafıl artileriyyasını bizə bəli, bəli daha konkret desək, Əli Kərimliyə yönəldib, onun barəsində düz 8 mənfi qeyd yazdı.
Əsas fikir də bu idi ki, karma özünü göstərir, Əli Kərimli Elçibəyə etdiyi xəyanətin cəzasın alır...

***
İndi yenidən etirazçı xalq rejimə qarşı səfərbər olub. Gənclər, yaşlı nəsil müqavimət hərakatı formalaşdırır; hamımızın təmannası var ki özünə ziyalı deyən hər kəs bu prosesin altına çiyin versin, bu məqamda da Seymur bəy müxalifəti hədəfə aldı. Özü də hansısa axmaq, mühbəm "dissident"lərin sözü ilə. Bəs bilməzsiniz, o dissidentlər Seymur bəyə deyib ki, bu gün müxalifətin öndə gedənləri içi Elçibəy qarışıq KQB agenti olub.
Keçən il, Elçibəyə "xəyanət edənləri" kirə çıxardan yazarımız, bu ilə Elçibəyin özünü heç edir və ümumən hərakatı gözdən salır.
Buna ürəkbulandırmaq deyirlər.
Mən tək bir şey üçün dua edirəm: Allah eləsin, Seymur Baycanın bu siyasi səbatsızlığı, ekstrimal vəziyyətdə atını köndələn çapması təsadüf olsun, cəhənnəm ən pis halda cığallıq olsun.
Yoxsa, adamın ağılına başqa şeyi gələr və həyata nifrət edərsən.

PS. Hər qulaqdan dolma fikirlərlə xalqın dəyərli insanlarını ləkələmək olmaz. Çox ciddi ittihamlar irəli sürülərkən gərək adam özü də çox ciddi olsun.
Qulaqdan dolma söhbətlərə iman gətirməliyiksə, 4 il bir əvvəl guya Seymur Baycanın bir ictimai fəalı ermənilər əleyhinə MTN-lə əməkdaşlıqa sövq etməsi barədə yayılan söhbətlərə biganə qalmamalıyıq.

27.9.13

İlham Əliyev və Yezid (ikinci yazı)

Bakı Dövlət Universiteti...
Bu təhsil ocağından M. Ə. Rəsulzadənin adını Əliyevlər götürüb.
BDU-nun yaranmasında Rəsulzadənin danılmaz rolu olduğunu bilə-bilə.
Bu hakimiyyət BDU-da illərdir Rəsulzadəyə abidə qoymağa da "pul tapmır".
Bu hakimiyyət illərdir dərsliklərdən Rəsulzadə ilə birgə nə qədər şərəfli insanın mövzu olaraq çıxarır, onların yerini Əliyevlərlə, Paşayevlərlə doldurur.
Bunlar demək hələ şükürlük imiş.
Xəbəriniz olsun, BDU-də Müaviyyə oğlu Yezidin şeirləri tədris olunur.
Bəli, bəli yanılmadınız imam Hüseynin başını kəsən Yezidin!

Dostlar, mən dindar deyiləm, ölkə əhalisinin çoxu da bəlkə də mənim kimidir. Ancaq kim inkar edə bilər ki, bu ölkədə "Ya Əli" deyəndə yüzminlər riqqətə gəlir, "Yezid" deyəndə ondan da çox insan nifrətlə dolur?
Odur ki, bu fakt dilə gətirilməlidir, dəyişiklik etmək istəyən şəxslər İlham Əliyev hakimiyyətinin yezidilik simasını ifşa etməlidir.
Bu torpaqlarda imam başı kəsən adamın şeirlərini tərənnüm edən zehniyyət səs ala bilməz. Təki xalq bundan agah olsun!
vəssalamu əleykum.

25.9.13

REAL vəziyyət belədir

REAL-çılarla aramızda baş verən söz davasına bu gün bir sıra KİV yer ayırıb.
Bir: Ən pisi odur ki, bu mövzuda daha çox düşmənlərin yazdığı məqalə tirajlanıb və paylaşılıb.
Bu mövzunu işləyən saytın sahibi Lider TV-də əxlaqsız və mənəviyyatsız sujetləri ərsə gətirən məxluqdur, onun adını və saytını bura yazıb şərəf vermək istəmirəm.
Mən REAL-la aramızda olan söz davasın inkar etmirəm, narazılığım narahatlığım bu "davanı" düşmən mətbuatının təqdim ediyi formada hörmətli "Yeni Müsavat" və mia.az kimi mətbu nəşrlərdə yer almasıdır. 
Lütfən, o yaramaz adamın məhsullarına bir də sahib durmayın, ona həyat verməyin. İmkan verin, kanalizasiya təfəkkürü ilə o öz həyatın yaşasın.
İki: Bu yazıda mənə istinadən yayılan "REAL-çılar İlqar Məmmədovun məzlum durumundan sui-istifadə edib, onun imicini xərcləyirlər" fikirindəki "məzlum" sözü birmənalı qarşılanmayıb.
Burda işlədilən məzlum sözü, izahlı lüğətdə də ək olunduğu kimi “Zülm çəkmiş, zülm olunmuş, zülmə məruz qalmış, zülm altında olan” anlamındadı və mənim İlqar bəyi bu durumdan kənarda təsvir etməyim mənəviyyatsızlıq olardı.
REAL-a olan bütün iradlarıma rəğmən İlqar bəyi xalqımızın qiymətli insanı sayıram. Onun azadlığı üçün əlimdən gələn hər işi görməyə hazıram.

24.9.13

Atalar və oğullar

Türkel Kərimli
 Etibarlı şahidləri var, deyirlər Heydər Əliyev oğlu İlham Əliyevi məzəmmət edərkən tez-tez ona örnək Əli Kərimlini göstərərmiş. Təxminən, bu formada: o kolxozçu Əmirhüseynin oğlu, bu da sən-prezident oğlu.
Əli Kərimli
Bu müqayisə İlham Əliyevə əzab verən və bu gün də Əli Kərimliyə qarşı düşmən münasibətinin formalaşdıran ən ciddi kompleksə səbəb oldu.
Bu gün İlham Əliyevin Əli Kərimlidən həm də atasının ona yaşatdığı aşağılıq kompleksinin qisasını almaq istəyir.
Bir kompelksdən qurtarmamış daha biri ona urcah oldu.
Bilirisiniz, Əli Kərimlinin bu gün ədalətsizcəsinə, sırf böhtan ucbatından həbsə atılan oğlu Türkel Kərimli İngiltərənin ən nüfuzlu 5 universitetlərindən birində təhsil alır.
Onun təhsil nailiyyətləri isə son dərəcə parlaqdır. Qısası, əlaçıdır və universitetdə göstəriciləri ilə fərqlənən 15 tələbədən biridir.
Bəs İlham müəllimin övladlarının təhsil uğurları barədə nə bilirik?
Şəxsən mən heç nə.
Bildiyim odur ki, onun övladlarının İspaniyadakı hansısa kursu bitirmələri barədə sertifikatları var.
Bu detallar sizə balaca görünə bilər. 

Ancaq, unutmayın böyük mərkələrin arxasında çox vaxt belə xırda məqamlar durur.
Xülasə, Türkelin həbsi həm də, bəlkə də ən basilica olaraq İlham Əliyev paxıllığından qaynaqlanır.

Əli Kərimli ona bir aşağılıq kompleksi bəxş etmişdi, Türkel də daha birini əta etdi.