"Qanuni" olaraq mən necə həbs oldum?


15 oktyabr 2003-də Azərbaycanda prezident seçkisi keçirilirdi.
Həmin seçkidə AXCP-nin müşahidəçi idim.
Seçki  saat 7-də qurtaracaqdı.
Böyük çətinliklə saat 5-dək xırda istisnalara olmaqla saxtakarlığa imkan vermədim.
5-də rayondan əyyanlar gəldi. Onlar yerli məmurlarla məni danışığa çəkdilər. Yan otaqda nələr təklif olundu, bu haqda geniş danışmayaq. Hamısına "yox" cavabları verib, seçki otağına qaytdım.
Otağın qapısını açanda gördüklərim dəhşət idi. Komissiya üzvü olan müəllim yoldaşlarım (mən məktəbdə tərbiyəvi işlər üzrə müavin idim) qarğa-quzğun kimi ağ bülletenlərə daraşmışdı. Bülletenlərdə İlham Heydər oğlunun adı nişanlanırdı.
Bu həyasız saxtakarlığa necə hiddətləndimsə bağırdım: belə etməyin.
Müəllimlər biri sakit tövrlə: niyə qışqırırsan, belə gəlib belə də gedəcək-dedi.
Ani qərarı necə verdim, xatırlamıram: stolun üzərindəki ağ bülletenləri götürüb qaçdım.(İstintaqın rəyinə görə onların sayı 501 ədəd idi) Sürətim nə qədər idi, onu da yaza bilməyəcəm:). Görünür babat qaçmışam, komissiya üzvləri özlərinə gələndə mən heç kimin ağlına gəlmədiyi bir həmkəndlimin evində beçə soyutması yeyə-yeyə hakimiyyəti söyürdüm.
Telefonumu söndürmüşdüm ki, əmilərimin aramsız zəngləri qarşısında duruş gətirə bilim.
Ailəmiz üçün çox ağır anlar idi. Atam qəflətən vəfat etmiş, hələ qırxı çıxmamışdı. Mənim bu hərəkətim yerli qaydalara görə "əbləh övlad" statusuna da uyğun gəlirdi. Mənsə prinsipimin müdafiəsini hər şeydən başda tutmuşdum.
Rayon hüquq-mühafizə orqanları bütünlüklə kəndimizə səfərbər olmuşdular. Fövqəladə vəziyyət idi. Seçkinin bitmə saatına az qalmış telefonumu açdım.
Şərtlər yağış kimi yağmağa başladı..."Bülletenləri qaytar, filan şey sənin, hansı namizədə istəyirsən səs yazaq, razılaşaq, həbs olunacaqsan, mən ölüm, ölmüşəm yerdən götür..."
Kinolarda əsirləri geri qaytarma səhnələri kimi idi hər şey. Bülletenlər əsirim idi. Bircə şərt dedim: Qutunu açın, protokolu yazın verin filankəsə. Rəqəmləri mənə deyəcəksiniz, bülletnlər sizdədir.
Belə də oldu...
Və gecə özüm gedib prokurorluğa təslim oldum.
17 oktyabrda məhkəmə barəmdə 2 aylıq həbs qətimkan tədbiri seçdi. Onunla da həbsxanaya "xoşgördük" dedim...
 Bundan sonrası ictimaiyyət üçün maraqlı olsa yazacağam :)

"Azadlıq" qəzeti həbsim barədə (tarix 28 oktyabr 2003)