11.5.11

“Biz gedirik gələcəyə qaliblərin cərgəsində”

(Bu məqaləm 2006-ci ilin oktyabrında "Azadlıq" qəzetində çıxıb)
Ilham Əliyev təqvim üzrə prezidentliyinin 3 ili ötdü. Neçə gündür Ilhamnamələr azərbaycanlıları feyziyab edir. Telekanalların israrla dediyinə görə, Ilham Əliyev atasının siyasi varisi kimi hakimiyyətə yiyələnməsəydi, məmləkətimiz dəhşətli fəlakətə uğrayardı. Məsələn, Xəzər neftini alan olmadığından uzun BTC “turba”larını pas tutacaqmış, xalqın sevimlisi olan Ilhamə, Ağadadaş, Bilal Əliyev səslərinə embarqo qoyub bir daha oxumayacaqlarmış.
Siyasi geopolitiklər lap qaramat doğrayırlar. Deyirlər, Ilham Əliyev prezident olmasaydı və Fransaya dalbadala səfər edib Jak Şirakı bağrına basmasaydı, yağı fransızların erməni soyqırımını tanımaları bu qədər yubanmazdı. 470 minlik gözəgörünməz iş yerləri açılıdığını da I.Əliyevin uğuruna yazanlar var. Nə bilim, vallah, bunlar ağır məsələlər olduğundan heç nə deyə bilmərəm. Ancaq Ilham Əliyevin konkret iki sahəyə verdiyi böyük töhfəni bu yazımla etiraf etməliyəm. Bunlardan birincisi onun incəsənət adamlarına yaratdığı şəraitdir. Onun hakimiyyəti bərqərar olandan görün, ölkədə nə qədər şou-müsaqibələr keçirilib. “Azərstar”, “Yeni ulduz” buna oxşar daha nə qədər incə ruhlu müsaqibəsbələr məhz onun hakimiyyətindən ilhamlanıb. Hələ tinbaşı zühur edən şadlıq evlərini demirəm. Adətən işğal olunan rayonların adını daşıyan bu şadlıq evlərində hesablayın, nə qədər incə və qalın sənət xadimləri pul qazanıb bala saxlayır. Doğrusu, xalqımız onun bu sahədəki əməyini layiqincə qiymətləndirmir. Gəlin, açıq danışaq. Ilham Əliyev Avrasiya siyasi səhnəsində nə böyük iş görmüşdü? Buna baxmayaraq, Türkiyə ona Avrasiyada ilin siyasətçisi adlı mükafat verdi. Bizdə də mədəniyyət və incəsənətə dair mükafatlar var-"Humay", “Qızıl Buta”. Nə olardı onlardan birini Ilham müəllimə verəndə.
Ölkədə Ilham Əliyevdən sonra çiçəklənən memarlıq sənətinin inkişafını necə inkar emək olar? Bəyəm, hər yerdə ucaldılan ümumilli heykəlləri gözünüz görmür? Axı, onların hamısı incəsənət əsəridir. Ilham Əliyevin və başqa dövlət xadimlərinin o ümmummilli heykəllərə başəymə hadisəsinə siz elə də sadə iş kimi baxmayın, bu, yaradılan incəsənət əsərinə, memar zəhmətinə sayğı və etiramın göstəricisidir. Ilahi, bu dərəcədə incə qəlbə malik olan insan niyə də mükafatlandırılmamalıdır?
Dövlət başçısının ikinci mühüm tərifəlayiq işi Bakı şəhərində körpülərin tikintisi barədə verdiyi sərəncamdır. Bəzi aqressiv ünsürlərsə hakimiyyətin körpüləri salmaqda 120 min dollarlıq Hummerlərinə rahat yol təmin etmək niyyətindən danışır. Mənsə bu körpülərin salınmasında bir ülvi niyyət görürəm. Siz şəhər parklarını gəzəndə skamyalar üzərində gecələyən insanları görmürsünüz? Axı açıq havada yatmaq onların səhhəti üçün ciddi problemlər yaradır. Revmatizim, böyrək çatışmazlığı kimi xəstəliklər evsiz-eşiksiz vətəndaşlarımızı vaxtsız olaraq yaxalayır. Körpülərin salınması isə bu problemi çox mükəmməl həlli variantıdır. Birincisi, minlərlə həmvətənimiz müasir tipli üstübağlı sığıncaq qazanır, ikinci tərəfdən, kifayət qədər pərən- pərən düşmüş milli qavroşların toparlanması kimi mühüm hadisəyə start verilir. Mütəxəssislərin bildirdiyinə görə, inşa edilən 9 körpünün altında dostluq və qardaşlıq şəraitində ən azı 1000 nəfər insan gecələyə bilər. Necə də xoş və sevindirici gələcək.