23.5.10

Fəlakətli Ilham Əliyev

Hakimiyyətyönlü deputat Nazim Məmmədov “Bizim Yol” qəzetinə daşqınların onda müəyyən şübhə yaratdığından danışıb. Deputat deyib ki, təkcə 2010-cu ildə büdcədən Meliorasiya və Su Təsərrüfatı Səhmdar Cəmiyyətinə builki xərcləri üçün 200 milyon manatdan çox pul ayrılıb və bu qədər vəsaitə sahilbərtkitmə işlərini kifayət qədər normal aparmaq olardı.  Əlbəttə olardı.
200 milyon manata, yalan olmasın, Qazaxdan Neftçalaya qədər təzə Kür və ya Heydər Əliyev adına kanal çəkmək mümkündür.
Amma Azərbaycanda büdcədən müəyyən sahələrə pul iş görmək, əhalinin rifahı üçün deyil, korrupsiya üçün münbit şərait, əsas yaratmaq üçün ayrılır.
200 milyon manat haqqında deputat “müəyyən şübhələr”ə dalsa da, geniş ictimaiyyət üçün burda şübhəli bir iş yoxdur. Pulu basıb görməmişcəsinə yeyiblər, üstündən su da içiblər. Həm də təkcə bu il yox, illərdir belədir.
Həm də Əhmədzadə onu tək həzm-rabedən keçirməyib, belə olsaydı onun hülqumunu çoxdan üzmüşdülər. Bizdə nədə qayda-qanun, ədəb-əkran olmasa da, korrupsiya şəbəkəsində ciddi intizam, dəqiq haqq-hesab var. Hünəri nədir, hansısa nazir, komitə sədri, JEK müdiri “ümumi katyoldan” pul gizləsin, yuxarılara çatacaq pulun qəpiyinə tamah salsın... Aman, aman, iraq olsun, belədə adamın atasına od vurarlar. Onunçün Kür daşqınlarına görə Əhmədzadənin cəzalandırılacağı, işdən qovulub türməyə salınacağı haqda deyilənlər mənə əfsanə kimi gəlir. Əslinə baxsan, onu işdən qovmaqla hakimiyyət bu adama mərhəmət göstərmiş olar. Iti ölənə sürütdürərlər, bu qədər biabırçılığın, selin-suyun cəfası Əhmədzadənin çiynindən niyə götürülsün ki?.. Qoy o da nəhayət, yumşaq kreslosundan bir aylıq da olsa uzaq olub, başına gün döyə-döyə xalqın problemi ilə uğraşsın.
Deputat Nazim Məmmədov onu da deyib ki, büdcədən bəndbərkitmə işlərinə ayrılan pulların necə xərcləndiyini müəyyənləşdirmək üçün audit yoxlamalar başlamalıdır. Deyəsən, bu deputat əndazəni aşır, yaxud növbəti ayların Hüseyn Abudullayevi olmaq istiqamətində avantürist planları var. Əzizimiz Nazim müllim, o yoxlamaların bir ucu gedib tutaq ki, Sabirabaddakı Heydər Əliyev mərkəzinə, yaxud Olimpiya idman Kompleksinə çıxsa, bilirsinizmi ki, bu şəxsən sizin üçün Kürün gətirdiyi fəlakətdən daha dəhşətli fəlakət olar?
O butulkalar hamınızı təhdid edir
“Həbs olunanda məni üç gün ”Bandotdel"də lüt saxlayıblar. Məni orda butulkanın üstündə otuzdurublar və ifadə alıblar. Heç özüm də bilməmişəm ki, nə danışmışam",- bu sözlər ADNA-kı 30 aprel terroruna görə təqsiriləndirilənlərdən biri - Nadir Əliyevin dünənki qəzetlərdə dərc olunan məhkəmə çıxışıdır.
Dostlar, yoldaşlar, bu nə biabırçılıqdır? Bu nə rəzalətdir, bu nə ölkədir? Azərbaycanın dövlət himnində belə bir yer var
“...namusunu hifz etməyə
Cümlə gənclər müştaqdır".
Bu o deməkdir ki, yəni gənclər Azərbaycan dövlətini qanına boyansa da, qorumağa müdafiə etməyə hazırdır. Ay-hay. Azərbaycan dövləti (hərçənd burda dövlət sözü çox yersizdi) öz gənc vətəndaşını zorlayır, onun namusuna təcavüz edir, insana yaraşmayan rəftara məruz qoyur, belə dövləti necə müdafiə etmək olar?
Lütfən, qalxıb mənə “dövlət ayrı, hakimiyyət ayrıdır” kimi leksiya oxumağa cəhd etməyin. Məhkəmədə hökm YAP hakimiyyəti adından çıxarılmır, Azərbaycan dövləti adından çıxarılır.
Bir daha yadıma Əli Kərimlinin gənclərlə görüşdə dediyi fikirlər düşür: “Ilham Əliyev Azərbaycan dövlətinin varlığı üçün təhlükədir”. Bəlkə razı deyilsiniz?..
(23 may 2010 tarixdə "Azadlıq" qəzetindəki məqaləm)